पोखरा (हाम्रो खेलकुद) – नमस्ते पोखरा प्रिमियर लिग अन्तर्गत मंगलबार हुने फाइनल खेलमा पोखरा पल्टन र  चितवन राइनोज भिड्दै छन् । खेल पोखरा रंगशालास्थित क्रिकेट मैदानमा विहान ११ बजे सुरु हुनेछ ।

पोखरा अंक तालिकाको शीर्ष स्थानमा रहँदै सिधै फाइनल पुगेको हो भने चितवनले अाइतबार भएको एलिमिनेटरमा काठमाडौं रोयल्सलाई पराजित गरेको थियो । नेपाली राष्ट्रिय क्रिकेट टिमका कप्तान पारस खड्का चितवनको नेतृत्व सम्हालिरहेका छन् भने पोखराको कप्तानी शरद भेषावकरले गरेका छन् । फ्रेन्चाइज लिगमा पारस र शरदको कप्तानीमा रहेको टोली तेस्रो पटक अामने सामने हुँदैछन् । यसअघि धनगढी प्रिमियर लिगको पहिलो संस्करण र एभरेष्ट प्रिमियर लिगको पछिल्लो संस्करणमा पारसको टोली विजयी रहेको छ ।

खेलको अघिल्लो दिन सोमबार दुवै टोलीका कप्तानले साराङकोटमा माछापुच्छ्रेको अगाडि म्याच प्रेस कन्फरेन्समा ट्रफी बोकेका थिए । सँगसँगै दुवै टोली कप्तानले अा-अाफ्नाे धारणा पनि राखे ।

पारस खड्का, चितवन राइनोज कप्तान

दुई राम्रो टिम फाइनलमा पुगेको छ । भोलिको खेल रोमाञ्चक हुनेछ । पोखरा प्रिमियर लिगको पहिलो संस्करणको जुन खालको रेस्पोन्स पाएको त्यसमा एकदमै खुशी महसुस भएको छ । भोलि मैदानमा दर्शक धेरै आउनेमा आशावादी छु । यो नेपाली क्रिकेटको लागि राम्रो खबर पनि हो । नयाँ ठाउँ क्रिकेटको माध्यमबाट छुट्टै खालको पहिचान बनाउन सफल भएको । टोलीले एकतृत प्रदर्शन गर्दै फाइनलमा पुगेका छौं । धेरै खुशी र उत्साहित छु । आशा गरै राम्रो क्रिकेट खेलेर सबैलाई खुशी पार्नेछौं ।

प्रतियोगिताको पहिला के भयो र पछि के हुन्छ भन्ने भन्दा पनि राम्रो क्रिकेट खेल्ने हो । टिमको रुपमा पछिल्ला चार खेलमा राम्रो खेलेका छौं । त्यही लयलाई निरन्तरता दिँदै सकरात्मक नतिजाको लागि खेल्नेछौ । पहिलाको नतिजा बिर्सेर अाउने खेलमा के गर्न सक्छौं भनेर अघि बढ्ने । राम्रो क्रिकेट खेल्नेछौं । शरदसँगै फाइनल खेल्नु संयोग हो । अरु टिम पनि राम्रा थिए । हामी पनि राम्रो गरेर नै फाइनलमा पुग्न सफल भएको ।

पोखरामा क्रिकेटले सुखद अनुगमन गरेको छ । जुन स्तरको प्रतियोगिता भयो र दर्शकहरु उपस्थित रहे, अाउने दिनमा अझ धेरै मान्छे आउनेमा विश्वस्त ।

शरद भेषावकर, पोखरा पल्टन कप्तान

फाइनलका लागि तयार । जे को लागि आएको त्यहाँ पुग्न एक कदम टाढा । घरेलु टिमबाट खेल्न पाएको कारण घरेलु दर्शकको साथ पनि छ । खेलमा नियन्त्रण गर्न सक्नुपर्छ । अन्य कुराको बारेमा सोच्नु भन्दापनि आफूले काम राम्रो गर्न सके नतिजा सकरात्मक आउनेमा केन्द्रित रहनेछौं ।

यो हाम्रो लागि अर्को एउटा खेल हो । अरुले जसरी लिएपनि हामी क्रिकेट खेल्नलाई नै यो प्रोफेसनमा आएका हौ । धेरै दवाव लिएर भन्दापनि खेलमा रमेर फाइनल खेल्ने ।

यति ठुलो प्रतियोगिता यति राम्रो शहरमा भएको छ । राम्रो प्रतिक्रिया पाएको छ । सबैभन्दा ठुलो कुरा त यसका लागि अायोजक र यसमा आवद्ध सबैलाई धन्यवाद दिनु पर्छ । यो इभेन्टको राम्रो प्रतिक्रिया नेपालमा मात्र हैन विदेशमा पनि भएको छ । यो नेपाली क्रिकेटको लागि खुशी लाग्दो कुरा ।