पोखरा (हाम्रो खेलकुद) – स्पिनर सन्नी पटेलले दोस्रो ओभरमा तीन विकेट लिंदै कसिलो बलिङ प्रदर्शन गरेपछि काठमाडौं रोयल्सले चितवन राइनोजलाई नमस्ते पोखरा प्रिमियर लिग (पीपीएल) मा ९५ रनको कमजोर लक्ष्य प्रस्तुत गरेको छ ।

पोखरा क्रिकेट मैदानमा टस जितेर पहिले ब्याटिङ गरेको काठमाडौं अन्तिम ओभरमा अलआउट हुनुअघि ९४ रनमात्र जोड्यो । राम्रो सुरुवात गरेको काठमाडौंले पहिलो ओभरमा १५ रन जोडेको थियो । दोस्रो ओभरमा भने काठमाडौंले महत्वपूर्ण तीन विकेट गुमायो । सन्नीले फ्याँकेको दोस्रो ओभरमा अमित श्रेष्ठ ९, गौरव तोमर १ र पवन सर्राफ शून्यमा आउट भए । नरेश बुढाएर लगत्तै  पारस खड्काको बलमा एलबिडब्लुको शिकार भए ।

काठमाडौंका लागि ओपनर जयकिशन कोल्सावाला र कप्तान ज्ञानेन्द्र मल्लले पाँचौ विकेटको लागि ३८ रनको साझेदारी गर्दै इनिङ्स उकास्ने प्रयास गरे । कप्तान ज्ञानेन्द्र मल्ल ३० रन तथा जयकिशन कोल्सावा २५ रनमा आउट भए । तल्लो क्रममा अन्य ब्याट्सम्यानले राम्रो साझेदारी गर्न नसक्दा काठमाडौं कम रनमा खुम्चियो । आदील खान, अमरसिंह राउटेला ९ र सुशन भारी ३ रनमा पेभेलियन फर्किए ।

ज्ञानेन्द्र मल्ल

काठमाडौंको ब्याटिङलाई ध्वस्त पार्ने क्रममा सन्नी पटेलले ४ ओभरमा ९ रन खर्चदै ३ विकेट लिए । भुवन कार्कीले १० रन खर्चदै २ विकेट लिए । स्मित पटेलले २ तथा करण केसी र पारस खड्काले १-१ विकेट हात पारे । चितवनले केहीवेरमा जवाफी ब्याटिङ थाल्नेछ ।

आजको खेलमा जित हात पार्ने टोलीले फाइनलमा स्थान बनाउनेछ । लिगको शीर्षस्थानमा रहँदै घरेलु टोली पोखरा पल्टन फाइनलमा पुगिसकेको छ । फाइनल मंगलबार हुनेछ ।