पोखरा (हाम्रो खेलकुद) – नमस्ते पोखरा प्रिमियर लिग (पीपीएल) अन्तर्गत शनिबार भएको अन्तिम चरणको लिग खेलपछि प्लेअफ र फाइनल पुग्ने टोलीको टुङ्गो लागेको छ । अन्तिम खेलमा चितवनले विराटनगरलाई पराजित गरेसँगै अंक तालिका अनुसार छिनोफानो भएको हो ।

निकै प्रतिस्पर्धात्मक प्रतियोगिताको अंक तालिकामा शीर्ष ४ टोलीको समान ६ अंक रहयो । नेट रनरेटको आधारमा पोखरा पल्टनले शीर्ष स्थान हासिल गर्दै सिधै फाइनलमा स्थान पक्का गर्यो । दोस्रो स्थानमा रनरेटकै आधारमा चितवन राइनोज रहयो भने तेस्रोमा काठमाडौं रोयल्सले स्थान बनायो ।

एक्स्पर्ट धनगढी ब्लुज भने समान ६ अंक भएपनि नेट रनरेटमा पछाडी पर्दै अर्को चरण पुग्न सकेन । प्रतियोगितामा सुरुवातको दुई खेल जित्दै शानदार सुरुवात गरेको बुटवल ब्लास्टर्सले भने प्रतियोगिताको अन्तिमतिर लगातार तीन खेल हार्यो । प्रतियोगिता अवधिभर एक जित मात्र दर्ता गर्न सकेको विराटनगर सुरुवातदेखि नै पुछारमा रहयो ।

फाइनलमा स्थान बनाउन अब आइतबार काठमाडौं र चितवन खेल्नेछन् । खेल दिनको ११ बजे सुरु हुनेछ । फाइनल मंगलबार हुनेछ ।

अंक तालिका :

पोखरा पल्टन ( ६ खेल, ३ जित, २ हार, ६ अंक, ०.७८८ रनरेट)

चितवन राइनोज ( ६ खेल, ३ जित, २ हार, ६ अंक, ०.५२३ रनरेट)

काठमाडौं रोयल्स ( ६ खेल, ३ जित, २ हार, ६ अंक, ०.१६५ रनरेट)

एक्स्पर्ट धनगढी ब्लुज ( ६ खेल, ३ जित, २ हार, ६ अंक, -०.३९८ रनरेट)

बुटवल ब्लास्टर्स ( ६ खेल, २ जित, ३ हार, ४ अंक, ०.३४ रनरेट)

विराटनगर टाइटन्स ( ६ खेल, १ जित, ४ हार, २ अंक, -१.३८५ रनरेट)