एजेन्सी – न्युजिल्यान्डलाई शुक्रबार भएको खेलमा ६ विकेटले पराजित गर्दै पाकिस्तानके एक खेल अगाडी नै ३ खेलको टी – २० क्रिकेट श्रृंखला एक खेल अगाडीनै जितेको छ । यो जितसँगै पाकिस्तानले लगातार ११ औं टी-२० सिरीज जित्ने कीर्तिमान कायम गरेको छ ।

शुक्रबार राती भएको खेलमा ६ विकेटले पराजित गर्दै पाकिस्तानले श्रृंखला आफ्नो कब्जामा पारेको हो । १ सय ५४ रनको लक्ष्य पाकिस्तानले २ बल अगाडी नै ४ विकेटको क्षतिमा पुरा गरेको हो । पाकिस्तानको जितमा ओपनर फकर जमान २४, बाबर आजम ४०, आशिफ अली ३८,मोहम्मद हफिज नट आउट ३४ रनमा रहँदा शोएव मालिकले १० रन जोडे । न्युजिल्यान्डका लागि एडम मिल्नीले २ तथा टिम साउदी र कोलिन मुनरोले समान एक विकेट लिए ।

यस अघि टस जितेर पहिला ब्याटिङ गरेको न्युजिल्यान्डले निर्धारित २० ओभरमा ७ विकेट गुमाउँदै १ सय ५३ रन जोडेको थियो । ओपनर मुनरोले २८ बलमा ४ चौका र २ छक्का प्रहार गर्दै ४४ रन बनाए । त्यस्तै कोरि एन्डरसन २५ बलमा ४ चौका र २ छक्का प्रहार गर्दै ४४ रनमा नट आउट रहँदा कप्तान केन विलियम्सनले ३७ रन बनाए । अन्य ब्याटम्यानले राम्रो प्रर्दशन गर्न सकेनन् । न्युजिल्यान्डलाई सस्तैमा रोक्न पाकिस्तानका युवा बलर शाहिन शाह अफ्रिदीले ४ ओभरमा २० रन खर्चेर ३ विकेट लिए । त्यस्तै हफिज र इमाद वासिमले समान एक विकेट हात पारे ।

यस अघि पहिलो टी २० खेलमा पाकिस्तान २ रनले विजयी भएको थियो । अन्तिम तथा तेस्रो टी २० खेल आगमी आइतबार हुने छ । पकिस्तान र न्युजिल्यान्डबीच थप ३ वान डे र समान टेस्ट श्रृंखला हुने छ ।