पोखरा (हाम्रो खेलकुद) – नमस्ते पोखरा प्रिमियर लिग (पीपीएल) को समुह चरणको अन्तिम दुई खेल आज हुदैँ छन् । दुई खेलको नतिजाले पीपीएलमा ६ टोलीको भविष्य टुङ्गो लाग्ने छ ।

कुनै पनि टोलीले प्ले अफमा आफ्नो स्थान बनाउन सकेका छैनन् । समुह चरणका अन्तिम दुई खेल बाँकी रहन सम्म सबै ६ टोलीकोनै प्ले अफमा स्थान बनाउन सक्ने अंकगणितीय संभावना देखिन्छ । आज हुने पहिलो खेलमा हुलास काठमाडौँ रोयल्स र घरेलु टोली पोखरा पल्टनबीच प्रतिस्पर्धा हुने छ । काठमाडौं विजयी भए सिधै फाइनल प्रवेश गर्ने छ । प्लेअफ खेल्नु पर्ने छैन । झिनो अन्तरले पराजित भए प्ले अफमा स्थान बनाउने संभावना उच्च रहेको छ ।

४ खेलमा ३ मा जित र १ मा हारका साथ काठमाडौं शीर्षस्थानमा रहेको छ । फराकिलो अन्तरले पराजित भए विराटनगर र चितवबीचको खेलको नतिजा पर्खनु पर्ने हुन्छ । काठमाडौंले पहिलो खेलमा धनगढीलाई १७ रनले हराउँदा विराटनगरलाई ५ विकेटले पराजित गरेको थियो । त्यस्तै तेस्रो खेलमा चितवनसँग १३ रनले पराजित हुन पुगेको काठमाडौँ चौथो खेलमा बुटवललाई ३७ रनले पराजित गर्दै शिर्ष स्थानमा उक्लिएको थियो ।

पोखरा विजयी भएपनि नभएपनि चितवन र विराटनगरको नतिजा पर्खनु पर्ने हुन्छ । पहिलो खेलमा विराटनगरलाई ५८ रनले हराएको पोखराले दोस्रो खेलमा वुटवलसँग ३३ रनले पराजित हुन पुगेको थियो । त्यस्तै तेस्रो खेलमा चितवनलाई ५ विकेटले पराजित गर्दा धनगढीसँग २ विकेटले पराजित भएको थियो । घरेलु टोली पोखराले ४ खेलमा दुईमा जित र २ मा हारका साथ अंक तालिकाको तेस्रो स्थानमा रहेको छ ।

दोस्रो खेलमा विराटनगर टाइटन्स र चितवन राइनोजबीच खेल हुने छ । विराटनगरले आजको खेल जितेपनि अघिल्लो चरणको संभावना न्युन रहेको छ । सोझो अर्थमा जित निकाले पनि बाहिरिने लगभग पक्का पक्की जस्तै छ । हारे आधिकारीक रुपमा बाहिरिने छ । यता चितवनले फराकिलो जित निकाल्न सके प्ले अफमा स्थान बनाउने छ भने सामान्य रन अन्तरले विजयी हुँदा र पहिलो खेलमा पोखरा पराजित भए चितवनको प्ले अफको ढोका खुल्ने छ । पहिलो खेलमा पोखरालाई काठमाडौंले फराकिलो अन्तरले पराजित गरे चितवन सामान्य अन्तरले पराजित हुन पुगे पनि प्ले अफको संभावना देखिन्छ ।

पहिलो खेलमा बुटवलसँग ७० रनले पराजित भएको चितवन दोस्रो खेलमा पोखरासँग ५ विकेटले पराजित हुन पुगेको थियो । त्यस्तै तेस्रो खेलमा धनगढीलाई १ सय २६ रन र काठमाडौँलाई १३ रनले पराजित गर्दै खेलमा पुनरागमन गरेको हो । चितवन ४ खेलमा दुईमा जित र २ मा हारको साथ चौथो स्थानमा रहेको छ ।

४ खेलमा ३ मा हार १ मा जितका साथ पुछारमा रहेको विराटनगर प्रतियोगिताबाट बाहिरिन औपचारिक निर्णय मात्र बाँकी रहेको छ । पहिलो खेलमा पोखरासँग ५८ रनले पराजित हुँदा दोस्रो खेलमा धनगढीसँग ७८ रन र तेस्रो खेलमा काठमाडौंसँग ५ विकेटले पराजित हुदैँ अघिल्लो चरणको यात्रा अनौपचारिक रुपमा सकाएको थियो । त्यस्तै चौथो खेलमा बुटवललाई १२ रनले हराउदै झिनो अंक गणितीय आशा कायम राखेको राखेको विराटनगरको अघिल्लो चरण प्रवेश गरे आश्चर्यनै हुने छ ।

अन्य टोलीको संभावना के ?

५ खेलमा ३ मा जित र २ मा हारका साथ दोस्रो स्थानमा रहेको धनगढी प्ले अफमा स्थान बनाउन पहिलो खेलमा काठमाडौंसँग पोखरा पराजित हुनुपर्ने हुन्छ । त्यस्तै दोस्रो खेलमा विराटनगरले चितवललाई हराउने सके धनगढीको प्ले अफमा आफ्नो स्थान पक्का गर्ने छ । त्यस्तै ५ खेलमा ३ मा हार र २ मा जितका साथ पुछारबाट दोस्रो स्थानमा रहेको वुटवलको अंक गणितीय झिनो आसा मात्र बाँकी रहेको छ । बुटवल प्ले अफमा पुग्नको लागि पोखरा र चितनवले पराकिलो अन्तरले पराजित हुनुपर्ने हुन्छ । यी दुई टोली मध्य एक टोली विजयी भए वुटवल स्वत बाहिरिने छ ।