पोखरा (हाम्रो खेलकुद) – नमस्ते पोखरा प्रिमियर लिग (पीपीएल) को लिग चरणका दुई खेल बाँकी रहँदा पनि अहिलेसम्म प्लेअफ र फाइनल पुग्ने टोलीको नाम टुङ्गो लाग्न सकेको छैन । शनिबार लिग अन्तर्गत दुई खेल हुँदैछन् । शुक्रबार खेल सकिंदा अंक तालिका झनै रोमाञ्चक बनेको छ । जुन सुकै टोलीले पनि प्ले अफमा आफ्नो स्थान बनाउन सक्ने अंकगणितीय संभावना देखिन्छ ।

शीर्ष स्थानमा रहेको काठमाडौंले ४ खेलमा ३ जित र १ हार बेहोरेको छ भने एक्स्पर्ट धनगढी ब्लुज ५ खेलमा ३ मा जित र २ मा हारका साथ दोस्रो स्थानमा छ । ४ खेलमा समान दुई जित र दुई हार भोगेको पोखरा पल्टन तेस्रो स्थानमा रहँदा ४ खेलमै २ हार र २ जितका साथ चितवन राइनोज चौथो स्थानमा रहेको छ । पाँचौ स्थानमा ५ खेलमा ३ मा हार र २ मा जितका साथ बुटवल ब्लास्टर्स रहँदा ४ खेलमा ३ मा हार र १ मा जितका साथ विराटनगर टाइटन्स पुछारमा रहेको छ । बुटवल र विराटनगरको झिनो अंक गणितीय सम्भावना बाहेक अन्य जुनसुकै टीमले प्ले अफमा आफ्नो स्थान बनाउन सक्ने सम्भावना रहेको छ । जस्को लागि बाँकी दुई खेलमा नतिजा आफु अनुकुल आउनु पर्ने हुन्छ ।

घरेलु टी– २० फे्रन्चाइज लिगमा सर्वाधिक धनराशी पुरस्कार रहेको यस प्रतियोगिता सुरु हुनु अघि खेलाडीलाई अक्सन मार्फत किनबेच (बोली लगाउने) गरिएको थियो । टिम मालिक र मार्की खेलाडीले निकै आसा र भरोसामा साथ महँगो मुल्य खर्चेका खेलाडीले पीपीएलमा त्यहि अनुसारको प्रर्दशन गर्न भने सकेनन् । महँगो मूल्यमा किनेका खेलाडीले सस्तो प्रर्दशन गरि रहेका छन् ।

सर्वाधिक महँगो मुल्यमा किनिएका स्पिनर बसन्त रेग्मी, तीव्र गतिका बलर करण के सी र ललित सिंह भण्डारीले राम्रो प्रदर्शन गरे । ललित चोटका कारण पछिल्लो दुई खेलमा उपस्थित रहेनन् । युवा ब्याटम्यान अनिल कुमार शाह, रोहित कुमार पौडेललगातले भने सन्तोषजनक प्रदर्शन गरेका छन् । केहि खेलाडीले भने मोटो रकम पाएपनि राम्रो प्रर्दशन गर्न सकि रहेका छैनन् । उत्कृष्ट प्रर्दशन गर्ने अनुमानसहित चर्को रकम खर्चिएका खेलाडीले सस्तो प्रर्दशन गर्दा टिमको नतिजामा पनि असर परेको छ ।

यी हुन् पीपीएलमा महँगो मूल्यमा किनीएका तर सस्तो अर्थात खराव प्रर्दशन गर्ने ८ खेलाडी  :

दिलिप नाथ

पछिल्लो समय राष्ट्रिय टिममा पनि खराब प्रर्दशनका कारण टिम बाहिर रहँदै आएका विकेटकिपर तथा ओपनर दिलिपनाथ जारी पीपीएलमा खराव प्रर्दशन गर्ने प्रमुख खेलाडी हुन् । २ लाख ४० हजार रुपैयाँमा एक्स्पर्ट धनगढी ब्लुजमा अनुबन्ध भएका नाथले ५ खेलमा कुल ४० रन पनि कटाउन सकेनन् । समुह चरणका सकिदा ५ खेलमा नाथले कुल ३२ रन मात्र बनाउन सके । उनले विकेटकिपिङ गर्ने क्रममा तेस्रो खेलमा चोट बोकेपछि सुवेन्दु पाण्डेले उक्त भूमिका निर्वाह गरेका छन् । उनी त्यसयता टोलीमा ओपनर ब्याट्सम्यानको भूमिकामा मात्र छन् ।

काठमाडौंविरुद्ध १० रनमा आउट भएका दिलिपले विराटनगरसँगको खेलमा मात्र ८ रन बनाए । चितवनबीरुद्ध डक आउट भए । त्यस्तै बुटवलसँगको खेलमा १० रन जोड्दा पोखराविरुद्ध ४ रन मात्र बनाए । धनगढीले नाथलाई दिएको मुल्य सम्झने हो भन्ने पक्कै पनि टिम मालिक र कप्तान अहिले उनको प्रदर्शनबाट खुसी छैनन् । उनले सुरुवातमा मध्यक्रममा खेल्न नसक्दा पछिल्लो केहि खेल इनिङको सुरुवात नै गरेका छन् ।

सागर पुन

घरेलु क्रिकेटमा लगातार राम्रो प्रदर्शन गर्ने सागर पुनमाथि ठुलो आशा, विश्वास अनि भरोसाका साथ बुटवलले सर्वाधिक मुल्य २ लाख ५० हजार खर्चेर अक्सनमार्फत उनलाई किनेको थियो । तर सागरले ५ खेलमा जम्मा ७९ रन बनाएका छन् । चितवनविरुद्ध उनले बनाएको ४६ रन नै सर्वाधिक रन हो । काठमाडौंसँगको खेलमा १ र पोखराविरुद्ध २ रन मात्र बनाउन सके । त्यस्तै विराटनगरसँग २९ र धनगढीविरुद्ध १ रन बनाए । राष्ट्रिय टिमको लामो अनुभव भएका अलराउण्डर सागरको प्रर्दशनबाट टिम निरास बनेको छ । बलिङमा पनि उनको प्रदर्शन सन्तोषजनक रहन सकेको छैन । पाँचै खेलमा बलिङ गरेका उनले २ विकेट मात्र लिएका छन् ।

आरिफ शेख

आरिफलाई चितवन राइनोजले २ लाख ५० हजार अधिक्तम मुख्यमा किनेको थियो । सुरुवाती चार खेल खेलेको चितवनले समुह चरणमा एक खेल खेल्न बाँकी रहेको छ । तर ४ खेल खेल्दा दुइपटक ब्याटिङ गरेका आरिफले खाता खोल्न पनि सकेका छैनन् । बुटवल र धनगढीसँगको खेलमा डक आउट भएका आरिफले अन्य दुई खेलमा ब्याटिङ गर्ने मौका पाएनन् । चितवनले जुन विश्वासका साथ मुल्य खर्चेको थियो आरिफले त्यसको विपरीत ब्याटिङ गर्न पुगे । पछिल्लो समय राष्ट्रिय टिमबाट राम्रो प्रर्दशन गर्दै आएका आरिफ पीपीएलको प्रर्दशन आफैले पनि सम्झन चाहँदैनन् ।

प्रदिप ऐरी

बुम बुम ऐरीको उप नामले चिनिने प्रदीपलाई विराटनगर टाइन्टन्सले २ लाख ४० हजार खर्चेर किनेको थियो । सुरुवाती चार खेल खेलिसकेको विराटनगरले समुह चरणको अन्तिम खेल खेल्न बाँकी रहेको छ । ४ खेलमा ४ खेलमै ब्याटिङ गरेका ऐरीले कुल ६४ रन मात्र बनाएका छन् । बुटवलबीरुद्ध ४३ बलमा ४१ रन प्रहार गरेका ऐरीले विराटनगरसँगको खेलमा १० रन जोडेका थिए । त्यस्तै धनगढीसँगको खेलमा ४ रन बनाउँदा काठमाडौंसँगको खेलमा ९ रन बनाउँदै पेभिलिएन फर्किएका थिए । सुरुवाती खेलमा ओपनरको भूमिका निर्वाह गरेका ऐरी अहिले मध्यक्रममा छन् । पछिल्लो खेलमा उनले बलिङ पनि गरेका थिए ।

मेहबुब आलम

पोखरा पल्टनमा १ लाख ६० हजारमा अनुवन्ध भएका आलम उमेर अनुसारकै प्रर्दशन गरि रहेका छन् । ढल्कँदो उमेरसँगै प्रर्दशन पनि खस्किएको छ । आलमले जारी प्रतियोगितामा ४ खेलमा जम्मा ३ विकेट लिएका छन् भने १२. ५ ओभर बलिङ गर्दै कुल १ सय २१ रन खर्चिएका छन् । बुटवलसँगको खेलमा २ ओभर बलिङ गरेका मेहबुवले १३ रन खर्चदा १ विकेट लिएका थिए । त्यस्तै धनगढीसँगको खेलमा २.५ ओभर बलिङ गर्दै ३४ रन खर्चिन पुगेका आलमले कुनै विकेट लिन सकेनन् । विराटनगरबीरुद्ध ४ ओभर १ मेडन सहित ३१ रन खर्चेका उनले एक विकेट हात पारेका थिए । चितवनविरुद्ध ४ ओभरमा ४३ रन खर्चेका आलमले मात्र एक विकेट हात पारेका थिए । ब्याटबाट पनि आलमको प्रदर्शन सुस्त छ । धनगढीविरुद्ध गोल्डेन डक भएका उनले अन्य दुई खेलमा ८ रनमात्र जोडेका छन् । आलमको प्रर्दशन हेर्न हो भने उमेरसँगै खेल पनि खस्केको प्रष्ट हुन्छ ।

सिद्धान्त लोहनी

लोहनीको नाम नेपाली क्रिकेटमा सन् २०१५ टी– २० विश्कप छनोटमा जर्सीविरुद्ध प्रहार गरेको हेलिकप्टर शटको कारण नै चर्चामा छ । त्यसयता घरेलु प्रतियोगितामा बिरलै चलेका लोहनीलाई बुटवलले १ लाख ६० हजार खर्चेर किनेको थियो । दुई पटक टोलीलाई जिताउने सुनौलो अवसर पाए पनि उनले त्यो सदुपयोग गर्न सकेनन् । समुह चरणका खेल सकिदा लोहनीले ५ खेलमा कुल ७० रन मात्र बनाउन सके ।

काठमाडौंविरुद्ध १३,चितवनविरुद्ध १७ नट आउट, विराटनगरविरुद्ध १५ र धनगढीविरुद्ध १२ रन जोडेका लोहनीले पोखराविरुद्ध १३ रन मात्र बनाउन सके । विराटनगर र काठमाडौंविरुद्ध म्याच फिनिस गर्दै आफुलाई पुन प्रमाणित गर्न सक्ने अवसर थियो तर त्यो सदुपयोग गर्न सकेनन् । फिनिसरको लागि महँगो मूल्य खर्चेको बुटवललाई सिद्धान्तले निराश बनाए ।

सुनिल धमला

पछिल्ला घरेलु प्रतियोगितामा उत्कृष्ट प्रर्दशन गर्दै राष्ट्रिय टिमका कमब्याकको ढोका ढकढकाई रहेका धमलाले यस पीपीएलमा खराव प्रर्दशन गरेका छन् । धमलामाथि विराटनगर टाइटन्सले २ लाख २० हजार रुपैयाँ खर्चेको थियो । तर धमलाले यस प्रतियोगितामा सोचे र आसा गरे अनुसार प्रर्दशन गर्न सकेनन् । धमला पहिलो पटक घरेलु लिगमा लयबाहिर देखिदा अन्य प्रतियोगितामा जस्तै आफ्नो ब्याटबाट हमला गर्न सकेनन् । समुह चरणको अन्तिम खेल खेल्न बाँकी रहेका विराटनगरको धमलाले चार खेलमा सबै खेलमा टिममा मौका पाए । ४ खेलमा धमलाले जम्मा ६२ रन मात्र बनाएका छन् । बुटवलसँगको खेलमा डक आउट भएका धमला पोखराविरुद्ध ११, धनगढीविरुद्ध २१ र काठमाडौंविरुद्ध ३० रन प्रहार गरे । पार्ट टाइम बलिङमा धमलाले २ विकेट पनि लिएका छन् ।

राजेश पुलामी मगर

पछिल्लो समय खराब लयका कारण राष्ट्रिय टिमबाट बाहिर रहेका राजेश पुलामी मगरले जारी पीपीएलमा पनि खराब प्रर्दशनलाई निरन्तरता नै दिएका छन् । अर्थात त्यो सुधार गर्न सकेनन् । जारी पीपीएलमा ४ खेलमा जम्मा ४० रन जोडेका उनले बुटवलसँगको खेलमा खाता मात्र खोलेका थिए । पोखरा ७, धनगढी २ र काठमाडौंविरुद्ध ३० रन बनाएका राजेशलाई विराटनगरले १ लाख ५० हजारमा किनेको थियो ।