पोखरा (हाम्रो खेलकुद) – नमस्ते पोखरा प्रिमियर लिग अन्तर्गत शुक्रबारको पहिलो खेलमा एक्स्पर्ट धनगढी ब्लुजले पोखरा पल्टनलाई २ विकेटले हरायो । खेलमा धनगढीका कप्तान दीपेन्द्रसिंह ऐरी म्यान अफ द म्याच भए ।

उनले धनगढीको लागि अन्तिम ओभरमा १४ रन आवश्यक पर्दा मेहबुब आलमलाई २ चौका र १ छक्का प्रहार गरे । उनले खेलको सुरुवातदेखि नै जित दिलाउनेमा विश्वस्त रहेको बताए । ‘ अन्तिम ओभरमा १४ रन आवश्यक थियो । छोटो बाउन्ड्रीतर्फ सट प्रहार गर्ने योजना सफल भयो । सुरुवातदेखि नै जित दिलाउनेमा विश्वस्त थिएँ । मध्यक्रममा छिटो छिटो विकेट खस्दा केहि दबाब थियो,’ उनले भने ।

‘इनिङमा साथ दिएका रोबिनलाई म स्ट्राइक राखेर सट हान्छु भनेको थिए । अन्तिम दुई ओभर केहि कठिन भएको थियो ,’ दीपेन्द्रले थपे । दीपेन्द्रले ४ विकेट लिएका कमलसिंह ऐरीले राम्रो खेलेको र उनीमाथि सुरुवातदेखि नै विश्वास रहेको पनि बताए । अर्को चरण पुग्नेमा भने अब अन्य खेलको नतिजाले पनि असर पर्ने हुनाले आफ्नो हातमा नभएको बताए ।

पराजित टोलीका कप्तान शरद भेषवकारले भने प्रदर्शन राम्रो हुँदाहुँदै पनि जित दर्ता गर्न नसकेको बताए । ‘ अन्तिम दुई ओभरमा प्रदर्शन राम्रो नहुँदा खेल गुमाउनु पुग्यौं । दीपेन्द्रले राम्रो ब्याटिङ गर्दै टोलीलाई जितसम्म डोर्याए,’ उनले भने । शरदले चोटका कारण आफूले बलिङ गर्न नसकेकोले पनि घाटा भएको बताए । ‘मेरो औंलामा चोट लागेका कारण बलिङमा केही समस्या देखिएको हो । सबैले आफ्नो ठाउँबाट राम्रो खेल्ने प्रयास गरिरहेका छन् । म आशावादी छु । भोलि अझै एक खेल बाँकी रहेको टिमले पुनरागमन गर्नेछ,’ कप्तान भेषावकरले थपे ।

शरदले राशिद खानको प्रदर्शनको पनि खुलेर प्रशंसा गरे । ‘ राशिदले राम्रो खेलिरहेका छन् । भोलि सबैको लागि ‘गर या मर’ को अवस्था छ । खेल झन रोमाञ्चक बन्दै गएको छ । रन रेट राम्रो रहेकोले पनि अर्को चरणमा पुग्ने सम्भावना बलियो छ,’ उनले थपे । पोखराले लिगको अन्तिम खेलमा शनिबार काठमाडौं रोयल्सको सामना गर्नेछ ।

अन्तर्वार्ता भिडियो: