पोखरा (हाम्रो खेलकुद) – नमस्ते पोखरा प्रिमियर लिग (पीपीएल ) को १० औँ खेलमा हुलास काठमाडौँ रोयल्सलाई १३ रनले पराजित गर्दै चितवन राइनोजले प्रतियोगितामा लगातार दोस्रो जित निकालेको छ ।

टस हारेर पहिला ब्याटिङ गरेको चितवनले ओपरन हरिशंकर शाहको उत्कृष्ट प्रर्दशनमा निर्धारित २० ओभरमा ५ विकेट गुमाउदै मात्र १ सय ४९ रन बनाएको थियो । १ सय ५० रनको लक्ष्य पक्ष्याएको काठमाडौँ निर्धारित २० ओभरमा ९ विकेट गुमाउदै मात्र १ सय ३६ रन जोड्न सक्यो । काठमाडौँको लागि गौरव तोमर ३९ र कप्तान ज्ञानेन्द्र मल्लले ३० रन बनाएपनि टोलीलाई जिताउन सकेनन् । यो जितसँगै ४ खेलमा दुईमा जित र दुईमा हारका साथ चितवन अंक तालिकाको तेस्रो स्थानमा उक्लिएको छ ।

त्यस्तै ३ खेलमा दुईमा जित र १ मा हारका साथ काठमाडौँ एक स्थान तल झर्दै चौथो स्थानमा पुगेको छ । यी दुबै टोलीको प्ले अफको संभावना भने कायमै छ । अंक तालिकामा पहिलो स्थानमा वुटवल बलास्टर, दोस्रो स्थानमा पोखरा पल्टन रहँदा पाँचौ स्थानमा धनगढी र पुछारमा विराटनगर रहेको छ । काठमाडौँलाई पहिलो पटक निरास बनाउदैँ चितवनलाई दोस्रो जित दिलाउन यी ३ खेलाडीले उत्कृष्ट प्रर्दशन गरे ।

हरि शंकर शाह

ओपनर हरि शंकर शाहले लगातार दोस्रो खेलमा अर्धशतक प्रहार गरे । अघिल्लो दिन( बुधबार ) धनगढीबीरुद्ध ५३ रन बनाएका शाहले आजको खेलमा ६० रन प्रहार गरे । शाहले आफ्नो इनिङ्समा ३ पटक महत्वपूर्ण जीवनदान पाएका थिए । १५, ५१ र ५८ रन बनाएर खेली रहको अवस्थामा काठमाडौँका फिल्डरले क्याच छोड्न पुगेका थिए । जुन काठमाडौँको लागि घातक बन्न पुग्यो । १९ ओभरको तेस्रो बलमा आउट हुनु अघि शाहले ४९ बलमा ५ चौका र ३ छक्का प्रहार गर्दै ६० रन बनाए । चितवनलाई प्रतिस्पर्धात्मक लक्ष्य सम्म पुर्याउन उत्कृष्ट प्रर्दशन गरेका शाह आजको खेलमा म्यान अफ द म्याच समेत घोषित भए ।

करण केसी

सामान्य स्कोर रक्षा गर्न करणले उत्कृष्ट बलिङ गरे । जारी प्रतियोगितामा उत्कृष्ट प्रर्दशन गदै आई रहेका करणले आजको खेलमा पनि त्यहि लयलाई निरन्तरता दिए । आफ्नो पहिलो स्पेलको पहिलो ओभरमा ८ रन खर्चेका करणले कुनै विकेट लिन सकेनन् । त्यस्तै दोस्रो स्पेल लिएर तेस्रो ओभरमा बलिङ गर्न आएका करणले पहिलो बलमै काठमाडौँका ओपनर अमित श्रेष्ठलाई विकेट किपर पुष्प थापाको हाटबाट क्याच आउट गराउदैँ १ रनमा पेभिलिएन फर्काए । आफ्नो तेस्रो स्पेल लिएर आएका करणले पहिलो र दोस्रो बल मल्ललाई डट गराए ।

मल्लले तेस्रो बलमा चौका र चौथो बलमा छक्का हानेका थिए । तर ५ औँ बलमा बोल्ड आउट गर्दै ३० रनमा पेभिलिएन फर्कापछि चितवनको जित सहज देखिएको थियो । त्यस्तै आफ्नो अन्तिम स्पेलको १९ औँ ओभरको अन्तिम बलमा काठमाडौँका अन्तिम आसा गरेका ब्याटम्यान अमर सिंह राउटेलालाई हरि शंकर शाहको हातमा क्याच थमाउदै चितवनको जित निश्चित जस्तै गरे । करणले चितवनलाई जिताउन सम्रगमा ४ ओभरमा ३४ रन खर्चेर ३ विकेट लिए ।

पारस खड्का

ब्याटिङमा सोचे जस्तो प्रर्दशन गर्न नसकेका कप्तान पारसले चितवनलाई दोस्रो खेल जिताउन बलिङ उत्कृष्ट गरे । विश्फोटक ब्याटिङ गर्ने क्षमताका गौरव तोमर क्रिजमा रहन सम्म काठमाडौँको जित सहज देखिएको थियो । गौरव तोमर आउट हुनु अघि काठमाडौँ १४ औँ ओभरमा ३ विकेटको क्षतिमा १ सय २ रन बनाई सकेको थियो । तर कप्तान पारस खड्काले १५ औँ ओभरको पहिलो बलमै भुवन कार्कीको हातबाट क्याच आउट गराउदैँ ३९ रनमा तोमर लाई आउट गरेपछि चितवन खेलमा फर्किदा काठमाडौले निरन्तर विकेट गुमाउदै गयो ।

पारसले गौरवको विकेट लिएसँगै सामान्य लक्ष्यमा चितवनको दोस्रो जित संभव देखिएको थियो । कसिलो बलिङ गरेका पारसले अन्तिम ओभर बलिङ गर्न आएका थिए । काठमाडौँलाई जितको लागि १७ रन चाहिएको थियो र हातमा दुई विकेट थियो । तर कप्तान पारसले ३ रन खर्चेर एक विकेट लिएपछि चितवनले दोस्रो जित निकाल्न सकेको हो । पारसले सम्रगमा ४ ओभरमा २३ रन खर्चेर २ विकेट लिए ।