पोखरा (हाम्रो खेलकुद) – नमस्ते पोखरा प्रिमियर लिग (पीपीएल) टी–२० क्रिकेटमा बुधबार भएको दोस्रो खेलमा विराटनगर टाइटन्सले बुटवल ब्लास्टर्सलाई १२ रनले पराजित गरेको छ । प्रतियोगितामा पहिलो जितसँगै विराटनगरले प्लेअफमा पुग्ने गणितीय सम्भावना कायम राखेको छ ।

विराटनगरले दिएको १ सय ४१ रनको लक्ष्य पछ्याउने क्रममा बुटवलले २० ओभरमा ८ विकेट गुमाएर १ सय २८ रनमात्र जोड्न सक्यो । अन्तिम ओभरमा जितका लागि १३ रन चाहिएको अवस्थामा किशोर महतोले कसिलो बलिङ गर्दै मेडन फ्याँके । उनले समग्रमा ४ ओभरमा १२ रन खर्चेर २ विकेट लिए । बुटवलका लागि भीम सार्कीले सर्वाधिक ५० रन बनाए । उनले रनआउट हुनुअघि ४२ बलमा ४ चौका र १ छक्का प्रहार गरे । ओपनर सागर पुन ३३ बलमा २९ रन जोड्दै आउट भए । मध्यक्रमका शंकर राना २३ रनमा सन्दीप लामिछानेबाट बोल्ड आउट भए । चिराग सुरी र प्रकाश केसीले खाता खोल्न सकेनन् ।

रोहन मुस्ताफा १ रनमा किशोर महतोको बलमा मोहम्मद जायदबाट क्याच आउटको शिकार भए । सोमपाल कामीले ९ बलमा ७ रनमात्र जोडे । विराटनगरका कप्तान सन्दीप लामिछानेले र किशोर महतोले समान २ विकेट लिए । सुनिल धमला र साहब आलमले १-१ विकेट लिए ।

त्यसअघि टस जितेर पहिले ब्याटिङ गरेको बिराटनगरले २० ओभरमा ७  विकेट गुमाएर १ सय ४० रन जोडेको थियो । मध्यम शुरुवात गरेको बिराटनगरका लागि मोहम्मद जायद आलमले ७२ रनको अर्धशतकीय इनिङ्स खेले । जायदले ४५ बलमा ६ चौका र ५ छक्का प्रहार गरे । प्रदीप ऐरीले ४१ रन जोडे । ऐरीले ४३ बलमा ३ छक्का प्रहार गरे । उनीहरुले तेस्रो विकेटको लागि ६७ रनको साझेदारी गर्दै इनिङ्स उकासेका थिए । राजु रिजालले ८ रन जोडे । राजेश पुलामी १ रनमा आउट भए ।

पहिलो विकेटको रुपमा सुनिल धमला शुन्यमा आउट भएका थिए । त्यसपछि जितेन्द्र सिंह ठकुरी २ रनमा आउट भए । पुष्प थापा ४ रनमा नट आउट रहे । बुटवलका ललितसिंह भन्डारीले २ तथा विपीन खत्री, मोहम्मद संसाद शेख र सागर पुनले समान १ विकेट लिए ।

यस जितसँगै विराटनगरको प्लेअफ सम्भावना जिवितै रहेको छ । सुरुवातको तीन खेलमा पराजित भएपनि विराटनगरले गणितीय सम्भावना कायम राखेको हो । विराटनगरले अब चितवन राइनोजसँग खेल्न बाँकी छ ।