पोखरा (हाम्रो खेलकुद) – पहिलो विकेटको लागि ओपनर अनिल कुमार साह र हरिशंकर शाहले १ सय १ रनको कीर्तिमानी साझेदारी गरेपछि चितवन राइनोजले नमस्ते पोखरा प्रिमियर लिग (पीपीएल) टी–२० क्रिकेटमा एक्सपर्ट धनगढी ब्लुजलाई १ सय ९४ रनको विजयी लक्ष्य दिएको छ ।

पोखरा क्रिकेट रंगशालामा टस हारेर पहिले ब्याटिङको निम्तो पाएको चितवनले निर्धारित २० ओभरमा ५ विकेट गुमाएर १ सय ९३ रनको योगफल तयार पारेको थियो । राम्रो शुरुवात गरेका चितवनका लागि ओपनर ब्याट्सम्यानद्धय हरि र अनिलले उच्च प्रदर्शन गरे । ३२ बलमा अर्धशतक पूरा गरेका हरिले ५३ रन जोडे । उनले ६ चौका र ३ छक्का प्रहार गरे । अर्का ओपनर अनिले साहले ३७ रनको योगदान दिए ।

अनिल आउट भएलगत्तै हरि पनि आउट भए । स्मित पटेलले २४ रनमा तथा कप्तान पारस खड्का १९ रनमा पेभेलियन फर्किए । महँगा खेलाडी आरिफ शेख फेरि शुन्यमा आउट भए । पहिलो खेलमा खाता खोल्न नसकेका आरिफले दोस्रो खेलमा ब्याटिङ पाएका थिएनन् । करण केसी र सन्नी पटेलले छैटौ विकेटको लागि ३१ रनको साझेदारी गरे । सन्नी पटेल २६ र करण ११ रनमा नटआउट रहे । धनगढीका कप्तान दीपेन्द्रसिंह ऐरी, कमल सिंह ऐरी, मन्जित श्रेष्ठ, आरिफ शेख र ड्यानियल लरेनसले समान १ विकेट लिए ।  धनगढीले केहीवेरमा जवाफी ब्याटिङ थाल्नेछ ।

हरिशंकर साह

सुरुवाती दुई खेलमा पराजित भएको चितवनलाई प्ले अफमा स्थान बनाउन आजको खेल जित्नै पर्ने दवाव छ । आजको खेलमा पराजित भए चितवनको लिग चरणबाटै घर फर्किनुपर्ने हुन्छ । यता, एक खेलमा जित र अर्को खेलमा पराजित भएको धनगढी आजको खेलमा जित हात पार्दै प्लेफ अफ पुग्ने सम्भावनालाई बलियो बनाउने योजनामा हुनेछ ।