पोखरा (हाम्रो खेलकुद) – नमस्ते पोखरा प्रिमियर लिग (पीपीएल ) मा आज दुई खेल हुँदै छन् । पहिलो खेलमा कप्तान पारस खड्का रहेको चितवन राइनोज र युवा क्रिकेटर दिपेन्द्र सिंह ऐरी कप्तान रहेको धनगडी एक्स्पर्टबीच प्रतिस्पर्धा हुने छ । खेल ९ बजेबाट हुने छ ।

सुरुवाती दुई खेलमा पराजित भएको चितवनलाई उपाधि होडको यात्रा कायमै राख्न आजको खेल जित्नै पर्ने हुन्छ । अन्यथा चितवन समुह चरणबाटै घर फकिनु पर्ने हुन्छ । चितवन पहिलो खेलमा वुटवलसँग ७० रनले पराजित हुदा दोस्रो खेलमा घरेलु टोली पोखरा पल्टनसँग ५ विकेटले पराजित हुन पुगेको थियो । यता एक खेलमा जित र अर्को खेलमा पराजित भएको धनगडीलाई अघिल्लो यात्रा बलियो बनाउन तेस्रो खेल जित्न पर्ने दवाव रहेको छ । धनगडी पहिलो खेलमा काठमाडौँसँग १७ रनले पराजित हुदाँ दोस्रो खेलमा विराटनगरलाई ७८ रनले हराएको थियो ।

त्यस्तै आजको खोस्रो खेलमा विराटनगर टाइटन्सले बलियो टोली वुटवल बलास्टरको सामना गर्ने छ । खेल १ : १५ बाट सुरु हुने छ । सुरुवाती दुई खेलमा जित निकालेको सोमपाल कामी कप्तान रहेको बुटवल प्रतियोगितामा कमजोर देखिएको विराटनगरमाथि जित निकाल्दैँ अंक तालिका शिर्ष स्थानमा कायमै रहन चाहान्छ । पहिलो खेलमा चितवनलाई ७० र दोस्रो खेलमा घरेलु टोली पोखरालाई ३३ रनले पराजित गरेको वुटवलको उच्च मनोवल समेत रहेको छ । ब्याटिङ र बलिङ दुबैमा निकै बलियो देखिएको वुटवलसँग विराटनगर पराजित भए समुह चरणबाटै बाहिरिने पहिलो टिम बन्ने छ ।

सुरुवाती तीन खेलमा लगातार पराजित भएको विराटनगर बाहिरिन अनौपचारिक निर्णय मात्र बाँकी रहेको छ । विराटनगर पहिलो खेलमा पोखरासँग ५८ रनले पराजित हुदाँ दोस्रो खेलमा धनगडीसँग ७८ रनको फराकिलो हार खान पुगेको थियो । तेस्रो खेलमा काठमाडौँसँग ५ विकेटले पराजित भएपछि विराटनगरको उपाधि जित्ने संभावनामा पुर्ण विराम लागेको हो । सन्दीप लामिछाने कप्तान रहेको विराटनगर बलिङमा बलियो देखिएपनि ब्याटिङमा निकै कमजोर देखिएको छ ।