पोखरा (हाम्रो खेलकुद) – विराटनगर टाइटन्सले हुलास काठमाडौं रोयल्सलाई नमस्ते पोखरा प्रिमियर लिग (पीपीएल) टी–२० क्रिकेटअन्तर्गत सोमबारको पहिलो खेलमा १ सय ५० रनको विजयी लक्ष्य दिएको छ ।

पोखरास्थित पोखरा क्रिकेट मैदानमा सोमबार भएको चौथो दिनको पहिलो खेलमा विराटनगर टाइटन्सले काठमाडौंलाई १ सय ५० रनको विजयी लक्ष्य दिएको हो । टस जितेर पहिले ब्याटिङ गरेको विराटनगरले राम्रो शुरुवात गर्दै निर्धारित २० ओभरमा ७ विकेट गुमाएर १ सय ४९ रन बनाएको थियो ।

विराटनगरका लागि ओपनर ब्याट्सम्यान सुनिल धमला र मोहम्मद जायदले पहिलो विकेटको लागि ६५ रनको साझेदारी गरेका थिए । पहिलो विकेटको रुपमा सुनिल धमला ३० रनमा आउट भए । मोहम्मद जायद ६७ रनमा आउट भए । ४७ बलमा जायदले ७ चौका र ४ छक्का हिर्काए । राजेश पुलामी मगरले ३० रनको योगदान दिए ।

एन्टन एन्ड्रियु ४ रनमा पभेलियन फर्किए । प्रदिप ऐरी ८ रनमा आउट भए । पुष्प थापा १ रनमा आउट भए । काठमाडौंका सुसन भारी र गौरव तमोरले समान २ विकेट लिए । वसन्त रेग्मीले पनि २ विकेट हात पारे । काठमाडौंले केहीवेरमा जवाफी ब्याटिङ थाल्नेछ ।

काठमाडौं लगातार दोस्रो जितको खोजीमा रहँदा विराटनगर पहिलो जितको खोजीमा छ । काठमाडौंले धनगढी ब्लुजलाई पराजित गरेको थियो । विराटनगर यसअघि पोखरा पल्टन र धनगढी ब्लुजसँग पराजित भएको थियो ।