काठमाडौं (हाम्रो खेलकुद) – एक पछि अर्को अन्तर्राष्ट्रिय चर्चित फ्रन्चाइज टी–२० लिग खेलिरहेका राष्ट्रिय टोलीका लेग स्पिनर सन्दीप लामिछाने बंगलादेश प्रिमियर लिग (बीपीएल) मा सिलेट सिक्सर्सबाट खेल्ने भएका छन् । सिलेटबाट अष्ट्रेलियाका आक्रमक ब्याट्सम्यान डेभिड वार्नर पनि खेल्ने छन् ।

दुई खेलाडीले सिधै अनुबन्धन गर्न सक्ने प्रावधान अनुसार अक्सन अघिनै सिलेटले सन्दीप र वार्नरलाई लिएको हो । सिलेटले वार्नर र सन्दीपलाई अनुबन्ध गरेको जनाएपनि कति रकममा गरेको भन्ने खुलाएको छैन । यस भन्दा अघिका संकरणमा सिलेटको कप्तानी वंगलादेशका ओपनर लिटन दासले गर्दै आई रहेका छन् । विपीएल आगमी जनवरी ५ देखी फेब्रुअरी८ सम्म बंगलादेशमा चल्ने छ ।

दक्षिण अफ्रिकासँग तेस्रो टेस्ट खेल दौरानमा बल टेम्परिङ प्रकरणमा मुख्य योजनाकार रहेको पुष्टि भएपछि वार्नरले एक वर्षे अन्तर्राष्ट्रिय प्रतिबन्ध खेपिरहेका छन् । वार्नरलाई अष्ट्रेलिया क्रिकेट बोर्डले राष्ट्रिय टोलीबाट १ वर्ष अन्तर्राष्ट्रिय खेल्न प्रतिवन्ध लागाएको छ भने फ्रेन्चाइज लिग खेल्न छुट दिएको छ । बल टेम्परिङ काण्डमा मुछिएका पुर्व कप्तान स्टिभ स्मिथ र वार्नरको प्रतिवन्ध आगमी फागुनमा मात्र फुकुवा हुनेछ ।

आईपीएलमा गत सिजनमा दिल्ली डेयर डेभिल्सबाट खेलेदेखि सन्दीप निरन्तर विश्वका चर्चित लिग खेलिरहेका छन् । सन्दीपले पछिल्लो समय क्यानडा ग्लोबल टि२०, क्यारेवियन प्रिमियर लिग, अफगानिस्तान प्रिमियर लिग खेलिसकेका छन् । त्यस्तै विश्वका चर्चित विग बास, टी –१० लगाएत अन्य लिगहरुमा पनि अनुबन्ध हुने क्रम जारी रहेको छ । सन्दीपलाई अन्तर्राष्ट्रिय लिग खेल्न भ्याइ न भ्याई रहेको छ । सन्दीप पछिल्लो एक वर्षमै फ्रेन्चाइज लिग खेलेर करोडपति बनिसकेका छन् ।