चित्तगोङ (एजेन्सी) – जिम्बाब्वेविरुद्धको तीन एक दिवसिय क्रिकेट श्रृंखला बंगलादेशले क्लिन स्विप गरेको छ । शुक्रबार राती भएको अन्तिम तथा तेस्रो खेलमा ७ विकेटले पराजित गर्दै घरेलु टोली श्रृंखला क्लिन स्विप गर्न सफल भएको हो ।

२ सय ८७ रनको लक्ष्य पक्ष्याएको बंगलादेशका लागि ओपनर इमरुल कायस र सौम्य सरकारले शतक प्रहार गरेपछि ४२.१ ओभरमा ३ विकेट गुमाउँदै लक्ष्य सहजै पुरा गरेको हो । पहिलो ओभरको पहिलो बलमै ओपनर लिटन दासलाई डक आउटमा गुमाएको बंगलादेशले दोस्रो विकेटका लागि कायस र सरकारले २ सय २० रनको दोहोरो शतकको साझेदारी गर्दै सहज जित दिलाएका हुन् ।

१ सय १२ बलको सामना गरेका कायसले १० चौका र २ छक्का प्रहार गर्दै १ सय १५ रन बनाए । त्यस्तै आक्रमक रुपमा ब्याटिङ गरेका सरकारले ९२ बलमा ९ चौका र ६ छक्का प्रहार गर्दै १ सय १७ रन जोडे । कायस खेलम म्यान अफ द म्याच हुँदा सरकार म्यान अफ द सिरिज घोषित समेत भए ।

त्यस अघि टस हारेर पहिला ब्याटिङ गरेको जिम्बाब्वेले सेन विलियम्सनको शतकमा निर्धारीत ५० ओभरमा ५ विकेट गुमाएर २ सय ८६ रन बनाउन सकेको थियो । सेनले १ सय ४३ बलमा १० चौका र १ छक्का प्रहार गर्दै १ सय २९ रनमा अविजित रहे । त्यस्तै बेन्डम टेलर ७५, सिकन्दर राजा ४० र पिटर मुरले २८ रन बनाएका थिए । बंगलादेशका नजमुल स्लामले २ लिए ।

त्यस अघि बंगलादेश पहिलो खेलमा २८ रनले विजयी हुँदा दोस्रो खेलमा ७ विकेटले जितेको थियो । अब जिम्बाब्वे र बंगलादेशबीच दुई टेस्ट श्रृंखला हुने छ ।