पोखरा (हाम्रो खेलकुद) – पर्यटकीय नगरी पोखरामा आजबाट शुरु भएको पोखरा प्रिमियर लिग (पीपीएल) टी–२० विराटनगर टाइटन्सलाई घरेलु टोली पोखरा पल्टनले १ सय ९८ रनको विजयी लक्ष्य दिएको छ ।

पोखरा क्रिकेट मैदानमा टस हारेर पहिले ब्याटिङ गरेको पोखराले निर्धारित २० ओभरमा ३ विकेट गुमाएर १ सय ९७ रन बनाएको हो । राम्रो शुरुवात गरेको पोखराका लागि ओपनर कुशल भुर्तेल र मोहम्मद आरिफ शेखले ५३ रनको साझेदारी गरेका थिए । कुशल ३८ रनमा आउट भए । उनलाई सन्दीप लामिछानेले आफ्नो पहिलो शिकार बनाएका थिए । २६ बलमा ३८ रन जोड्ने क्रममा कुशलले ५ चौका र २ छक्का प्रहार गरे । अर्का ओपनर मोहम्मद आरिफ शेख ५२ रनमा शाहव आलमको बलमा प्रदीप ऐरीबाट क्याच आउट भए ।

दोस्रो विकेटका लागि आसिफ र रवि इन्दर सिंहले दोस्रो विकेटको लागि ९४ रनको साझेदारी गरे । भारतीय खेलाडी रवि इन्दर सिंह ४४ रनमा आउट भए । आक्रमक पारी खेलेका विनोद भण्डारी ४१ रनमा नटआउट रहे । भण्डारीले ११ बलमा ५ छक्का र २ चौकाको मद्दतमा ४१ रन बनाउदा कप्तान शरद भेषवाकर ७ रनमा नटआउट रहे । विराटनगरका सन्दिप लामिछानेले २ विकेट लिए । शाहव आलमले एक विकेट लिए । विराटनगरले केही बेरमा जवाफी ब्याटिङ थाल्नेछ ।