बिसाकापट्नम (एजेन्सी) – भारत र वेस्ट इन्डिजको दोस्रो एकदिवसीय क्रिकेट टाई भएको छ। जितका लागि ३ सय २२ रनको लक्ष्य पछ्याएको वेस्ट इन्डिजले पनि ३ सय २१ रन नै जोड्यो ।

टस जितेर ब्याटिङ गरेको भारतका लागि कप्तान विराट कोहलीले नटआउट १ सय ५७ रन प्रहार गर्दै सचिनको १७ वर्ष पुरानो किर्तिमान तोडेका थिए । कोहलीलाई साथ दिँदै अम्बाटि रायडुले ७३ रन जोडेपछि भारतले ६ विकेट गुमाउँदै ३ सय २१ रन बनाएको थियो ।

जवाफमा वेस्ट इन्डिजले निर्धारित ५० ओभरमा ३ सय २१ रन नै बनायो । वेस्ट इन्डिजले ३६ रनमा ओपनर किरन पावेल र ६४ रनमा चन्द्रपौल हेमराजलाई गुमाएको थियो । त्यसपछि ७८ रनमा मार्लन स्यामुएल्सलाई गुमाएको इन्डिजका लागि होप र सिम्रोन हेटमियरविचको १ सय ४३ रन को साझेदारीले इन्डिजलाई खेलमा फर्काएको थियो । आक्रामक रुपमा प्रस्तुत भएका हेटमियरले ७ छक्का प्रहार गर्दै ६४ बलमा ९४ रन जोडे । होप भने १ सय २३ रनमा अविजित रहे ।

अन्तिम बलमा जितका लागि ५ रन चाहिएको स्थितिमा होपले उमेश यादवको बलमा चौका प्रहार गरेका थिए । खेलको म्यान अफ द म्याच कोहली भए । यस नतिजासँगै ५ खेलको वान डे सिरिज १-० कै स्थितिमा छ । भारतले पहिलो वानडे ८ विकेटले जितेको थियो ।