पोखरा (हाम्रो खेलकुद) – सर्वाधिक पुरस्कार राशीको क्रिकेट प्रतियोगिता नमस्ते पोखरा प्रिमियर लिगको विजेता टोलीले २७ लाख रुपैयाँ प्राप्त गर्ने भएको छ । आयोजक क्विन्स इभेन्ट्स प्रा.लि.ले बुधबार प्रेस विज्ञप्ति जारी गर्दै प्रतियोगिताको पुरस्कारबारे जानकारी दिएको हो ।

शुक्रबारदेखि सुरु हुने पीपीएलको टाइटल स्पोन्सरमा नमस्ते प्रिमियम लागर बियर र पावर्ड बाइमा ग्रान्डमास्टर त्रिपल एक्स रम रहेको छ । विजेता टोली २७ लाख र उपविजेता टोलीले १० लाख रुपैयाँ प्राप्त गर्नेछन् । पूर्वघोषित पुरस्कार अनुसार प्रतियोगिताको म्यान अफ द सिरिज, उत्कृष्ट ब्याट्सम्यान र उत्कृष्ट बलरले सुजुकी जिक्सर १ सय ५५ सीसी मोटरसाइकल प्राप्त गर्नेछन् ।

प्रतियोगिताको हरेक खेलमा रिलायन्स सुपर टेक सिमेन्ट म्यान अफ द म्याचले नगद १० हजार रुपैयाँ तथा हरेक खेलको विजेता टोलीले रिलायन्स सिमेन्ट विनिङ बोनसस्वरुप नगद पुरस्कार १५ हजार ५ सय रुपैयाँ प्राप्त गर्नेछ । पीपीएलका हरेक खेलमा पनि विधागत व्य्कतिगत पुरस्कार राखिएको छ । खेलको उत्कृष्ट क्याच लिनेले ‘क्लियर टिभी क्लियर क्याच’ स्वरुप सुबीसुको प्रिमियम प्याकेज प्राप्त गर्नेछन् । सबैभन्दा कम बलमा अर्धशतक प्रहार गर्ने खेलाडीले ‘सुबीसु फास्टेस्ट ५०’ शीर्षकमा १ वर्षका लागि हाइ स्पिड इन्टरनेट सुविधा पाउनेछन् ।

प्रतियोगिताको एसोसियट पार्टनरमा सुजुकी जिक्सर, सुबीसु, रिलायन्स ग्रुप, ईसेवा, अग्नि इन्कर्पोरेट, मंगलम पाइप रहेका छन् । यसबाहेक पीपीएलले  हस्पिटालिटि पार्टनरमा ओयो, बैंकिङ पार्टनरमा नबिल बैंक, मेडिकल पार्टनरमा ग्रान्डी हस्पिटल, इन्स्योरेन्स पार्टनरमा एनएलजी र नेसनल लाइफ इन्स्योरेन्स, क्लोथिङ पार्टनरमा टि१० स्पोर्ट्स, फुड पार्टनर बरुण हस्पिटालीटि, क्रिएटिभ पार्टनर पर्फेक्ट क्रिएसनको साथ् पाएको छ ।

खेल सामाग्री संस्था  एक्सटेपको पनि प्रतियोगितामा साथ रहनेछ । प्रतियोगिताको प्रवर्द्धनमा नेपाल पर्यटन बोर्ड, भिजिट नेपाल २०२०, राष्ट्रिय खेलकुद परिषद, पोखरा महानगरपालिकाको पनि हातेमालो रहेको छ । पीपीएलको सम्पूर्ण खेलको प्रत्यक्ष प्रसारण हिमालयन एचडी टेलिभिजनले गर्नेछ ।

प्रतियोगिताको उद्घाटन खेलमा शुक्रबार विराटनगर टाइटन्स र पोखरा पल्टन भिड्दै छन् । पोखरा पल्टन पछिल्लो केहि दिनदेखि पोखरामा छ भने विराटनगर आज पोखरा आउंदैछ । पोखराको मार्की खेलाडीमा शरद भेषावकर तथा विराटनगरमा सन्दीप लामिछाने मार्की खेलाडी रहेका छन् ।