काठमाडौं (हाम्रो खेलकुद)- पोखरामा शुक्रबार सुरु हुने पोखरा प्रिमियर लिग (पीपीएल) टिम एक्स्पर्ट धनगढी ब्लुजले मंगलबार  १८ सदस्यीय टोलीको घोषणा गरेको छ ।

टिम एक्स्पर्ट धनगढी ब्लुजले काठमाडौंमा  पत्रकार सम्मेलन गरी आफ्नो टिममा अनुबन्धित भएका सबै १८ खेलाडी सार्वजनिक गर्दै टोली घोषणा गरेको हो । धनगढीले मंगलबार मार्की प्लेयरसहित अक्सनबाट १४, आइकोनिक खेलाडी र विदेशी खेलाडी समान २ गरी कुल १८ जना खेलाडी सार्वजनिक गरेको हो ।
एक्सपर्ट धनगढी ब्लुजका निर्देशक सुवास प्रधानले सबै खेलाडी युवा रहेपनि टिम बलियो बनेको बताए । ‘अक्सनमा पनि हामीले युवा खेलाडीलाई अनुबन्ध गरेका थियौ । मिडिल अर्डरमा कहेी कमजोर देखिएपनि हामली दुई इंग्लिस खेलाडी अनुबन्ध गरेका छौं,’ निर्देशक प्रधानले भने, ‘युवा खेलाडीले भरिएको टिम साँच्चै बलियो बनेको छ । टोली उपाधि जित्न सक्षम र तयार छ ।’
धनगढीले सार्वजनिक गरेको खेलाडीमा मार्की प्लेयरमा दीपेन्द्रसिंह ऐरी रहेका छन् । त्यस्तै, मन्जित श्रेष्ठ, दिलिप नाथ, सौरभ खनाल, विक्रम थगुन्ना, फिर्दोश अन्सारी, सागर ढकाल, कमलसिंह ऐरी, रोविन क्षेत्री, सन्दीप सुनार, सन्दीप जोरा, सन्दीप रजाली, सन्तोष भट्ट र योगेन्द्रसिंह कार्की रहेका छन् ।
त्यस्तै, आइकोनिक खेलाडीमा सुबेन्दु पाण्डे र अरुणसिंह ऐरी रहेका छन् ।

ड्यानिएल विलियम लब्रेन्स
ड्यानिएल विलियम लब्रेन्स इंग्ल्यान्डका घरेलु प्रतियोगिता खेल्दै आएका खेलाडी हुन् । २१ वर्षीय ड्यालिएल अलराउन्डर हुन् । उनले इंग्ल्यान्डको उमेर समूहबाट क्रिकेट खेल्दै आफ्नो प्रतिभा देखाइसकेका छन् ।
पिटर डेभिड ट्रेगो
पिटर डेभिड ट्रेगोले इंग्ल्यान्डका विभिन्न क्लबबाट पनि खेलिसकेका छन् । ३७ वर्षीय अलराउन्डर पिटर एक अनुभवी खेलाडी हुन् । उनको आगमनले धनगढी ब्लुजको टिम निकै राम्रो हुने मानिएको छ ।

पिपिएल कात्तिक ९ देखि २० गतेसम्म पोखरा रंगशालामा हुनेछ । प्रतियोगितामा एक्स्पर्ट धनगढी ब्लुजसँगै विराटनगर टाईटन्स, चितवन राईनोज, पोखरा पल्टन, बुटवल ब्लास्टर र काठमाडौं रोयल्स गरी ६ टिम रहेका छन् ।