एजेन्सी – कप्तान विराट कोहली र ओपनर रोहित शर्माले शतक बनाएपछि भारतले वेस्ट इन्डिजविरुद्ध पहिलो वान डेमा ८ विकेटको जित हासिल गरेको छ ।

वेस्ट इन्डिजले प्रस्तुत गरेको ३ सय २३ रनको विशाल लक्ष्य भारतले २ विकेट गुमाउँदै ४३ औं ओभरमा पूरा गर्यो । ओपनर शिखर धवन दोस्रो ओभरमा ४ रन जोड्दै पेभेलियन फर्केपनि विराट र रोहितले दोस्रो विकेटका लागि २ सय ४६ रनको विशाल साझेदारी गरेका थिए । कोहलीले १ सय ७ बलमा २१ चौका र २ छक्कासहित १ सय ४० रन जोडे । उनी देवेन्द्र विशुको बलमा ३३ औं ओभरमा स्टम्पिङ आउट भएका थिए ।

ओपनर रोहितले १ सय १७ बलमा अविजित १ सय ५२ रनको महत्त्वपूर्ण इनिङ खेले । उनले १५ चौका र ८ छक्का प्रहार गरे । उनलाई अन्त्यतिर अम्बाटि रायुडूले अविजित २२ रनको योगदान दिए । वेस्ट इन्डिजका लागि विशु र ओसेन थोमसले १-१ विकेट लिएका थिए ।

त्यसअघि वेस्ट इन्डिजका लागि शिम्रन हेटमेरले शतक बनाएपछि भारतले ठूलो लक्ष्य पाएको थियो । वेस्ट इन्डिजले ५० ओभरमा ८ विकेट गुमाउँदै ३ सय २२ रन जोडेको थियो । हेटमेरले ७८ बलमा ६ चौका र ६ छक्काको मदतले १ सय ६ रन जोडेका थिए । ओपनर कैरन पावेलले ५१ रन जोड्दा अन्य शीर्ष ब्याट्सम्यानले उल्लेख्य योगदान दिन सकेनन् । तल्लोक्रममा जेसन होल्डरले ३८, विशुले २२ तत्गा केमार रोचले २६ रन जोडे ।

भारतका लागि युज्वेन्द्र चहलले ३ विकेट लिए । मोहमद शामी र रविन्द्र जडेजाले  २-२ तथा खलिल अहमदले १ विकेट हात पारे । पाँच खेलको वान डे सिरिजमा भारतले १-० को अग्रता बनाएको छ । दोस्रो वान डे बुधबार विशाखापट्टनाममा हुनेछ ।