एजेन्सी – मोहमद अब्बासले दोस्रो इनिङ्समा पनि पाँच विकेट लिएपछि पाकिस्तानले अस्ट्रेलियाविरुद्ध दोस्रो टेस्टमा ३ सय ७३ रनको फराकिलो जित दर्ता गर्दै सिरिज १-० ले जितेको छ ।

पाकिस्तानले प्रस्तुत गरेको ५ सय ३८ रनको विशाल लक्ष्य पछ्याउने क्रममा अस्ट्रेलिया १ सय ६४ रनमा अलआउट भयो । पहिलो इनिङमा खराब ब्याटिङ गरेको अस्ट्रेलियाले दोस्रो इनिङमा पनि सोहि प्रदर्शन दोहोर्याउँदा पाकिस्तानले सिरिजमा कब्जा जमाएको हो । अस्ट्रेलियाका लागि मार्नस लाबुसेनले सर्वाधिक ४३ रन जोडेका थिए । ट्राभिस हेडले ३६ तथा आरोन फिन्चले  ३१ रन जोडे । अन्य शीर्ष ब्याट्सम्यान चल्न नसक्दा अस्ट्रेलिया कमजोर योगफलमा सिमित रहयो ।

पाकिस्तानका मोहमद अब्बासले लगातार दोस्रो इनिङमा ५ विकेट लिँदै पाकिस्तानलाई सहज जित दिलाए । उनलाई यासिर साहले ३ तथा मिर हम्जाले १ विकेट लिएर साथ दिए । त्यसअघि पाकिस्तानले पहिलो इनिङमा २ सय ८२ तथा दोस्रोमा ४००-९ को स्थितिमा पारी समाप्तिको घोषणा गरेको थियो । अस्ट्रेलियाले पहिलो इनिङमा १ सय ४५ रन मात्र जोड्न सकेको थियो ।

खेलमा कुल १० विकेट लिएका मोहमद अब्बास म्यान अफ द म्याच भए । दुवै टेस्टमा सशक्त प्रदर्शन गरेका कारण उनलाई म्यान अफ द सिरिज पनि चुनियो । अस्ट्रेलियाका उस्मान खवाजाले उत्कृष्ट ब्याटिङ गरेपछि पहिलो टेस्ट बराबरीमा सकिएको थियो ।