काठमाडौं (हाम्रो खेलकुद) – अफगानिस्तान प्रिमियर लिग (एपीएल) अन्तर्गत आइतबार काबुल ज्वाननका २० वर्षीय अफगानी ब्याट्सम्यान हजरतुल्लाह जजाईले एकै ओभरमा ६ छक्का प्रहार गरेका छन् ।

बल्ख लेजेण्डविरुद्ध भएको खेलमा जजाईले १२ बलमा अर्धशतक पूरा गर्दै सर्वाधिक छिटो अर्धशतक प्रहार गर्ने कीर्तिमान पनि बराबरी गरे । यसअघि युवराज सिंहले सन् २००७ को टि-२० विश्वकपमा १२ बलमा अर्धशतक पूरा गरेका थिए । उनले त्यस खेलमा इंग्ल्यान्डका स्टुआर्ट ब्रोडलाई लगातार ६ छक्का प्रहार गरेका थिए ।

वेस्ट इन्डिजका क्रिस गेलले पनि १२ बलमा नै अर्धशतक प्रहार गरेका छन् । उनी आइतबार विपक्षी टोली बल्ख लेजेण्डबाट खेलिरहेका नै थिए । गेलले ४८ बलमा ८० रनको आक्रामक इनिङस खेलेपछि बल्खले २ सय ४५ रनको लक्ष्य प्रस्तुत गरेको थियो । गेल्ले १० छक्का प्रहार गरेका थिए ।

आइतबारको खेलमा जजाईले अब्दुल्ला मजारीको ओभरमा ६ छक्का प्रहार गरेका थिए । मजारीले एक बल वाइड फालेकाले एकै ओभरमा ३७ रन खर्चन पुगे । जजाईको आक्रामक ब्याटिङको बाबजुद उनको टोलीले जित दर्ता गर्न भने सकेन । काबुलले २० ओभरमा २ सय २३ रनमात्र जोड्न सक्यो ।

एकै ओभरमा ६ छक्का हानेको भिडियो हेर्नुहोस् :