दुबई (एजेन्सी) – मध्यक्रमका ब्याट्सम्यान हरिस सोहेलले दोस्रो दिन शतक बनाएपछि अस्ट्रेलियाविरुद्ध जारी पहिलो टेस्टको दोस्रो दिन पाकिस्तान बलियो स्थितिमा पुगेको छ । पाकिस्तान पहिलो इनिङसमा ४ सय ८२ रन अलआउट भयो ।

दोस्रो दिन पाकिस्तानको ब्याटिङ सम्हाल्ने क्रममा सोहेलले १ सय १० रनको उत्कृष्ट इनिङस खेले । २ सय ४० बलको सामना गर्दै उनले ८ चौका र २ छक्का प्रहार गरेका थिए । सोहेल्ले असद शफिकसँग मिलेर पाँचौ विकेटका लागि १ सय ५० रनको साझेदारी गरे । सफिकले पनि ८० रनको योगदान दिए । उनले १ सय ६५ बलको सामना गर्दै ९ चौका र १ छक्का हाने ।

तल्लोक्रममा भने पाकिस्तानको ब्याटिङ अपेक्षित हुन सकेन । बाबर आजम ४ रन जोड्दै आउट हुँदा कप्तान सरफराज अहमद १५ रनमा पेभेलियन फर्किए । बिलाल आसिफ १२ र यासिर साह ३ रनमा आउट भए । अस्ट्रेलियाका लागि पिटर सिडलले ३ विकेट लिएका थिए । नाथन लायनले २ तथा मिचेल स्टार्क, जोन होल्याण्ड र मार्नस लाबुसकाग्नेले १-१ विकेट हात पारे ।

अस्ट्रेलियाले दोस्रो दिनको अन्त्यतिर आफ्नो पहिलो इनिङसको १३ ओभर खेल्यो । टोली ३०-० को स्थितिमा रहँदा खेल समापन भएको थियो । ओपनरद्वय उस्मान खवाजा १७ र आरोन फिन्च १३ रनमा खेलिरहेका छन् । यो फिन्चको पहिलो टेस्ट हो । अस्ट्रेलिया अझैपनि पाकिस्तानभन्दा ४ सय ५२ रनले पछाडी छ ।