एजेन्सी- वेस्ट इन्डिजबीरुद्धको पहिलो टेस्ट खेलमा भारत इनिङ्स अन्तरले विजयी भएको छ । राजकोटमा सम्पन्न पहिलो टेस्टको तेस्रो दिन भारत २ सय ७२ रनले विजयी भएको हो । यो भारतको इनिङ्स अन्तरमा सबै भन्दा फराकिलो जित पनि हो ।

पहिलो इनिङ्समा १ सय ८१ मा अल आउट भएको वेस्ट इन्डिजलाई भारतले पुन दोस्रो इनिङ्स सुरु गर्न दिएको थियो । दोस्रो इनिङ्स मा १ सय ९६ रनमा अल आउट भएपछि तेस्रो दिनमै भारत इनिङ्स अन्तरले विजयी भएको हो । समग्रमा वेस्ट इन्डिजले दुइ इनिङ्समा कुल ३ सय ७७ रन बनाउन सक्यो भने भारतले ६ सय ४९ मा पहिलो इनिङ्स समाप्तीको घोषणा गरेको थियो ।

पहिलो इनिङ्समा भारतका रविचन्द्र आश्विन ४ विकेट लिदाँ मोहमम्द शामीले २ विकेट लिएका थिए । वेस्ट इन्डिजको दोस्रो इनिङ ध्वस्त बनाउन भारतका कुलदिप यादवले ५ रविन्द्र जडेजा ३ र रविचन्द्र आश्विनले २ विकेट लिए । पहिलो इनिङ्समा वेस्ट इन्डिजका रोस्टन चेशले ५३ र दोस्रो इनिङमा किरण पावेलले ८३ रन बनाउन बाहेक अन्य कुनै पनि ब्याटम्यानले भारतीय बलर सामु क्रिजमा टिकेर सम्झन योग्य प्रर्दशन गर्न सकेनन् । यस अघि टस जितेर पहिला ब्याटिङ गरेको भारतले दोस्रो दिनको दोस्रो शेसनमा ६ सय ४९ रनमा ९ विकेट गुमाउदैँ पहिलो इनिङ्स समाप्तीको घोषणा गरेको थियो । भारतलाई पहिलो इनिङ्समै ठूलो स्कोर बनाउन कप्तान विराट कोहली,पृथ्वी शा र अलराउण्डर रविन्द्र जडेजाले शतक प्रहार गर्दा ऋषभ पन्त र चेतेश्वर पुजराले अर्ध शतक बनाएका थिए ।

शा ले १ सय ५४ बलमा १९ चौका प्रहार गर्दै १ सय ३४, कोहलीले २ सय ३० बलमा १० चौका प्रहार गर्दै १ सय ३९ र जडेजाले १ सय ३२ बलमा समान ५ छक्का र चौका प्रहार गर्दै १ सय रन बनाएपछि भारतले ठूलो स्कोर बनाएको थियो । जडेजाको खेल जीवनमा यो पहिलो टेस्ट शतक थियो भने कोहलीको २४ औँ शतक थियो । शा को डेब्यू शतक हो ।

त्यस्तै ऋषभ पन्त ९२ र पुजराले ८६ रन बनाएका थिए । इन्डिजका देबेन्द्र बिशूले ४ तथा शेरमान लुईसले २ विकेट लिएका थिए । डेब्यूमै खेलमाशतक प्रहार गरेका ‘शा म्यान अफ द म्याच’ घोषित भए ।

भारतको यो कुनै पनि टिमबीरुद्ध इनिङ्स अन्तरमा फराकिलो जित पनि हो । यस अघि भारतको इनिङ्स अन्तरमा सबै भन्दा फराकिलो जित अफगानिस्तानबीरुद्ध २ सय ६२ रनको थियो । भारत र बेस्ट इन्डिजबीरुद्धको दोस्रो टेस्ट अक्टोबर १२ बाट हैदराबादमा सुरु हुने छ ।