राजकोट (एजेन्सी) – वेष्ट इन्डिजविरुद्धको पहिलो टेष्टको दोस्रो दिनको खेल सकिदा शुक्रबार भारतले ५ सय ५५ रनको विशाल अग्रता लिएको छ । दोस्रो दिनको खेल समाप्तीमा वेस्ट इन्डिज ९४–६ को कमजोर स्थितिमा रहेको छ । पहिलो इनिङमा भारतका ३ ब्याट्सम्यानले शतक प्रहार गर्दा २ ले अर्ध शतक पुरा गरेका थिए ।

खेलाडीको सामूहिक प्रदर्शनपछि भारतले घरेलु मैदानमा ९ विकेटको क्षेतिमा ६ सय ४९ रन जोड्दै इनिङ्स समाप्तीको घोषणा गरेको थियो । भारतलाई पहिलो इनिङ्समै ठूलो स्कोर बनाउन कप्तान विराट कोहली,पृथ्वी शा र अलराउण्डर रविन्द्र जडेजाले शतक पुरा गरे । ऋषभ पन्त र चेतेश्वर पुजराले अर्ध शतक बनाए ।

शा ले १ सय ५४ बलमा १९ चौका प्रहार गर्दै १ सय ३४, कोहलीले २ सय ३० बलमा १० चौका प्रहार गर्दै १ सय ३९ र जडेजाले १ सय ३२ बलमा समान ५ छक्का र चौका प्रहार गर्दै १ सय रन बनाएपछि भारतले ठूलो स्कोर बनाएको थियो । जडेजाको खेल जीवनमा यो पहिलो टेस्ट शतक थियो भने कोहलीको २४ औँ शतक थियो । शा को डेब्यू शतक हो ।

त्यस्तै ऋषभ पन्त ९२ र पुजराले ८६ रन बनाएपछि भारत दोस्रो दिनै वेस्ट इन्डिजबीरुद्ध ठूलो स्कोर खडा गरेको हो । इन्डिजका देबेन्द्र बिशूले ४ तथा शेरमान लुईसले २ विकेट हात पारे । दोस्रो दिनको अन्तिम सत्रमा २९ ओभर ब्याटिङ गरेको वेष्ट इन्डिजले ९४ रन बनाउन ६ विकेट गुमाएको अवस्थामा दोस्रो दिनको खेल सकिएको छ ।

वेस्ट इन्डिज अझैँ पहिलो इनिङमै ५ सय ५५ रनले पछि रहेको छ । वेस्ट इन्डिजका चेस्टन रोस २७ र किमो पाल १३ रनमा नट आउट रहदैँ भारतीय बलर सामु रन बनाउन संघर्ष गरि रहेका छन् । भारतका लागि मोहमम्द सामीले २ स्पिनरद्वय कुलदिप यादव,रविचन्द्र आश्विन र जडेजाले समान १ विकेट लिएका छन् ।