काठमाडौं (हाम्रो खेलकुद) – तेस्रो संस्करणको एभरेस्ट प्रिमियर लिग (इपिएल) को मिति घोषणा भएको छ । आयोजक एभरेस्ट प्रिमियर लिग (इपिएल) ले बिहिबार राजधानीमा पत्रकार सम्मेलनको आयोजना गर्दै तेस्रो संस्करणको इपिएल ८ डिसेम्वर देखि २२ डिसेम्वर अर्थात मंसिर २२ गतेबाट ७ पुससम्म हुन जानकारी गराएको हो ।

इपिएलका प्रवन्ध निर्देशक आमिर अख्तरले यसपटकको लिग अघिल्लो वर्षको तुलनानमा भव्य हुने बताएका छन् । उनले यसपटक उत्कृष्ट विदेशी खेलाडीसँगै उत्कृष्ट विदेशी प्रशिक्षक ल्याउने समेत बताए ।
यसपटकको इपिएल १५ दिनसम्म चलनेछ । हरेक दिन एक खेल गराउने आयोजकले जनाएको छ । यस प्रतियोगिताको लागि आयोजकले अन्तर्राष्ट्रिय क्रिकेट परिषद् (आइसीसी) लाई अप्रुभको लागि आवश्यक सामग्रीहरु पठाइ सकिएको र प्रतियोगिता हुनु अघिसम्म मान्यता पाउनेमा आयोजकले विश्वास लिएको छ ।

पहिलो संस्करणमा पञ्चकधन्य तेज च्याम्पियन बन्दा गतवर्ष नेपाली राष्ट्रिय टिमका कप्तान पारस खड्काको नेतृत्वमा रहेको विराटनगर वारियर्स च्याम्पियन बनेको थियो ।

फ्रेन्चाइजको आधारमा हुने प्रतियोगितामा ६ टिमको सहभागिता रहेको छ । सहभागी टिमहरुमा विराटनगर वारियर्स, चितवन टाइगर्स, ललितपुर प्याट्रियट्स, पोखरा राईनोज, भैरहवा ग्लाडियटर्स र काठमाडौं किंग्स ११ छन् ।