एजेन्सी –  हङकङका राष्ट्रिय क्रिकेट टोलीका विकेट किपर तथा ब्याटम्यान क्रिस कार्टरले २१ वर्षको उमेरमै क्रिकेटबाट सन्यास लिएका छन् ।

हङकङबाट ११ वान डे,१० टी–२० र १७ लिष्ट ‘ए ‘खेल खेली सकेका युवा क्रिकेटर कार्टरले आफु पाइलट बन्नको लागि सन्यास लिएको बताएका छन् । विश्व क्रिकेटको प्रतिष्ठित वेबसाइट क्रिकइन्फोका अनुसार कार्टर अब एडिलेड जानेछन् र दोस्रो श्रेणीका अधिकारी बन्नका लागि ५५ हप्ताको तालिम लिनेछन् ।

कार्टरले भनेका छन् – ‘मैले क्रिकेटका लागि पढाइ रोकेको थिएँ । तर मलाई पहिले देखि नै रुची पाइलट बन्नु थियो । अब पाइलट बन्नको लागि काम गर्ने बेला आएको छ । त्यसैले क्रिकेटबाट सन्यास लिएको हु’ । २१ बर्षीय युवा क्रिकेटर कार्टरले हङकङबाट वान डे क्रिकेटमा सन् २०१५ नोभेम्बर १६ युएई बीरुद्ध डेब्यू गरेका थिए ।

उनले वान डे क्रिकेटमा ९ खेलमा ब्याटिङ गर्दै कुल १ सय १४ रन बनाएका छन् । त्यस्तै टी–२० क्रिकेटमा ५ खेलमा ब्याटिङ गर्दै ५५ र लिष्ट ‘ए’ मा १५ खेलमा ब्याटिङ गर्ने मौका पाएका उनले कुल २ सय २१ रन बनाएका छन् । कार्टर केहि दिन अघि युएईमा जारी एसिया कपमा पनि टोलीमा परेका थिए ।

एसिया कपमा पाकिस्तानबीरुद्ध २ रन बनाएका उनले भारतबीरुद्ध ३ रन बटुल्न सकेका थिए । उनका लागि भारतसँगको खेल नै अन्तिम खेल पनि बनेको छ । उक्त प्रतियोगिताको छनोटमा कार्टरले नेपालविरुद्ध ८ रन जोडेका थिए ।