काठमाडौं, फागुन २२ नेपाल पुलिस क्लबले ‘प्रथम रुस्लान कप–२०७२’को उपाधि जितेको छ ।
त्रिवि क्रिकेट मैदानमा शनिबार भएको खेलमा पुलिसले अर्काे विभागीय त्रिभुवन आर्मीलाई ३ विकेटले पराजित गर्दै च्याम्पियन बनेको हो ।

आर्मीले दिएको १३१ रनको मध्यम लक्ष्य पुलिसले १९.२ ओभरमा ७ विकेट गुमाउदै पुरा ग¥यो । पुलिसको जितमा मध्यक्रमका ब्याट्सम्यान सिद्धान्त लोहनीले अविजित ४७ रनको योगदान दिए । आक्रमक ब्याटिङ गरेका लोहनीले २० बलमा एक चौका र ५ छक्काको मद्दतमा ४७ रन जोडे । योगेन्द्र कार्की १५ रनमा अविजित रहँदा अमित श्रेष्ठ २६ रनमा रनआउट भए । ओपनर ब्याट्सम्यान सुनिल धमला १० रनमा आउट भए । आर्मीका चन्द्र साउदले तीन विकेट लिए । सोमपाल कामी, सागर पुन र विक्रम सोवले समान एक–एक विकेट लिए ।

यसअघि टस जितेर पहिले ब्याटिङ गरेको आर्मीले निर्धारित २० ओभरमा ९ विकेट गुमाएर १३० रनको योगफल तयार पारेको थियो । आर्मीका अनिल मण्डलले ३२ रन जोडे । शरद भेषवाकर २३ रनमा पभेलियन फर्कदा सोमपाल कामी २० तथा राजु रिजाल १८ रनमा आउट भए । यस्तै विनोद भण्डारीले १२ रन जोड्दा अन्य ब्याट्सम्यानले दोहोरो अंकको योग छुन सकेन । आर्मीलाई मध्यम स्कोरमा रोक्न दिपेन्द ऐरी एक्लैले पाँच विकेट लिए । मञ्जित श्रेष्ठले दुई विकेट लिदा सुनिल धमलाले पनि एक विकेट हात पारे ।
विजेता बनेको पुलिसले ट्रफीसहित २ लाख रुपैया प्राप्त गरे । उपविजतेतामा चित्त बुझाएको आर्मीले १ लाख प्राप्त गरे ।
त्रिभुवन आर्मीका सागर पुन प्रतियोगिताको सर्वाेत्कृष्ट खेलाडी घोषित भए । उनले नगद १० हजार प्राप्त गरे । नेपाल पुलिसका सुनिल धमला वेष्ट ब्याट्सम्यान तथा पुलिसकै मञ्जित श्रेष्ठ वेष्ट बलर चुनिए । उनीरुले समान ८–८ हजार प्राप्त गरे । पुलिसकै सिद्धान्त लोहनी प्रतियोगितामा सर्वाधिक छक्का हान्ने खेलाडी भए । एपिएफका सुवास खकुरेल प्रतियोगितामा छिटो अर्धशतक बनाउने खेलाडी चुनिदा आर्मीका विनोद भण्डारी बबाल क्याच गर्ने खेलाडी चुनिए । उनीहरुले समान एक–एक हजार प्राप्त गरे ।