ढाका (एजेन्सी) – बंगलादेशमा जारी एसीसी यू–१९ एसिया कप क्रिकेटमा नेपालले दोस्रो खेल सोमबार अफगानिस्तानसँग खेल्ने छ । खेल नेपाली समय अनुसार बिहान ८ : ४५ बजे बाट सुरु हुने छ ।

पहिलो खेलमा भारतसँग १ सय ७१ रनको फराकिलो अन्तरले पराजित भएको नेपाललाई अघिल्लो चरणको आशा जिवित राख्नको लागि अफगानिस्तानसँगको खेल महत्वपूर्ण हुनेछ ।

अफगानिस्तानलाई हराउन नसके नेपाल समुह चरणबाटै घर फर्कने सम्भावना रहन्छ । नेपालले अन्तिम खेल मंगलबार युएईसँग खेल्दा अफगानिस्तानले भारतसँग खेल्ने छ ।

अफगानिस्तानले पहिलो खेलमा युएईलाई ५ विकेटले पराजित गर्दै अघिल्लो चरणको संभावना बलियो बनाएको छ । भारतले दोस्रो खेलमा आइतबार युएईलाई २ सय २७ रनले पराजित गर्दै सेमिफाइनल लगभग पक्का जस्तै गरिसकेको छ ।

गत संकरणमा भारतलाई १९ रनले पराजित गर्दै नेपाल सेमिफाइनमा पुगेको थियो । नेपाल अघिल्लो चरण प्रवेशको लागि दुबै खेल जित्नै पर्ने हुन्छ । युएई भने सुरुवाती दुई खेलमा पराजित हुदैँ एक खेल अगाडीनै समुह चरणबाटै बाहिरि सकेको छ ।

त्यस्तै समुह बी मा हङकङ,पाकिस्तान, श्रीलंका र बंगलादेश रहेका छन् । समुह ए र बी बाट शिर्ष दुई दुई टोली सेमिफाइनलमा प्रवेश गर्ने छन् ।