एजेन्सी – युएईमा जारी एसिया कप क्रिकेटको फाइनलमा बंगलादेशले भारतलाई २ सय २३ रनको लक्ष्य दिएको छ । दुबईमा टस हारेर पहिला ब्याटिङ गरेको बंगलादेशले ओपनर लिटन दासको शतकको सहयोगमा ४८ ओभर ३ बलमा अल आउट हुदैँ मात्र २ सय २२ रन बनाउन सक्यो ।

बंगलादेशका लागि ओपनर दास र मेहन्दी हसन मिराजले २१ ओभरमा १ सय २० रनको साझेदारी गर्दै विशाल योगफल तर्फ डोर्याउने संकेत देखाएका थिए । तर २१ औँ ओभरमा केधार जादवको बलमा आंबीत रायूडुले क्याच लिदैँ मिराजलाई ३२ रन पेभिलिएन फर्काएपछि भारत खेलमा फर्किएको थियो । मिराज आउट भएपछि बंगलादेशको विकेट पतन निरन्तर जारी रह्यो । सौम्य सरकार बाहेक अन्य कुनै पनि मिडिल अडरका ब्याटम्यानले दोहोरो अंकमा रन जोड्न सकेनन् । भारतीय बलर सामु कुनै पनि ब्याटम्यान क्रिजमा टिकेर लामो इनिङ खेल्न नसक्दा बंगलादेश २ सय २२ रनमा अल आउट हुन पुगेको हो ।

२१ ओभरमा १२० – १ को स्थितिमा रहेको बंगलादेश ३३ ओभरमा पुग्दा १५१–५ को स्थितिमा पुगेको थियो । छैटौ विकेटका लागि सौम्य सरकार र दासले ३७ रनको साझेदारी गर्दै बंगलादेशकोे संकट टार्ने काम गरेका थिए । दास भारतीय बलर सामु खुलेर खेलेपनि ४१ औँ ओभरमा कुलदिप यादवको बलमा विकेट किपर महेन्द्र सिंह धोनीको स्टिम्पिङ आउटको शिकार बने । दासले ११७ बलमा १२ चौका र २ छक्का प्रहार गर्दै १२१ रनमा पेभिलिएन फर्किए । सरकारले भारतीय बलरको डटेर सामना गरे तर अन्य ब्याटम्यानको साथ पाएनन् । उनले ४५ बलमा समान १ चौका र छक्का प्रहार गर्दै ३३ रनमा रन आउटको शिकार बने । बंगलादेशका अन्य कुनै पनि ब्याटम्यानले सम्झन योग्य प्रर्दशन गर्न सकेनन् । बंगलादेशका ८ ब्याटम्यानले दोहोरो अंकमा रन बनाउन सकेनन् ।

बंगलादेशका लागि नाजमुल इस्लाम ७, मोहमम्द मिथुन २, मुश्फिकर रहिम ५,महामुदुल्लाह ४,मशरफी मुर्तजा ७,इमरुल कायेस २ रनमा पेभिलिएन फर्किए । भारतका लागि कुलदीप यादवले ३, केधार जाधव २ र युजवेन्द्र चाहल र जसप्रित बुमराहले समान १ विकेट लिए ।