दुईब (एजेन्सी) – पाकिस्तानलाई ३७ रनले पराजित गर्दै युएईमा जारी एसिया कप क्रिकेट प्रतियोगिताको फाइनलमा भारतसँग भेट पक्का गरेको बंगलादेशलाई ठूलो झड्का लागेको छ ।

बंगलादेशका सबै भन्दा भरपर्दा अलराउण्डर सकिब अल हसनले एसिया कप गुमाउने भएका छन् । अभ्यासको क्रममा घाइते भएको कारण सकिब पाकिस्तानसँगको खेलमा खेलेका थिएनन् ।

वान डे र टेस्ट क्रिकेटका नं वान अलराउण्डर सकिबको देब्रे हातको कान्छी औँलामा चोट लागेको र उनी कम्तीमा ६ हप्ता मैदान बाहिर रहने बंगलादेश क्रिकेट बोर्डले जनाएको छ ।

जारी एसिया कपमा हसनले ४ खेलमा ४९ रन बनाउनुको साथै ७ विकेट लिएका छन् । बंगलादेशलाई फाइनलमा सकिबको अभाव खड्किन सक्ने देखिएको छ । त्यस्तै समूह चरणमा श्रीलंकासँग खेल्दा बंगलादेशका भरपर्दा तथा ओपनर तमिम इकवालको हात भाँचिएपछि एसिया कप गुमाएका थिए ।

त्यसैको कारण बंगलादेशको ओपनिङ ब्याटिङ पनि केहि कमजोर देखिएको छ । इकवाल बंगलादेशबाट वान डे खेलमा सर्वाधिक रन बनाउने खेलाडी समेत थिए । बंगलादेशले उपाधिको लागि शुक्रबार भारतसँग खेल्ने छ । खेल दुबईमा नेपाली समय अनुसार साँझ ५ : १५ बजे बाट सुरु हुने छ ।

अहिले सम्म भारतले ५ पटक एसिया कपको उपाधि जित्दा बंगलादेश एक पटक मात्र फाइनलमा पुगेको छ । बंगलादेश सन् २०१२ मा फाइनलमा पाकिस्तानसँग २ रनले पराजित हुदैँ उपाधि जित्न चुकेको थियो ।