यूएई (एजेन्सी)– एसिया कप क्रिकेटको सुपर फोर खेलमा पाकिस्तानले भारतलाई २ सय ३८ रनको लक्ष्य दिएको छ । दुबईमा टस जितेर पहिला ब्याटिङ गरेको पाकिस्तानले निर्धारित ५० ओभरमा ७ विकेटको क्षतिमा २३७ रन बनाउन सक्यो ।

पाकिस्तानका लागि शोएब मालिकले उत्कृष्ट ब्याटिङ गरे । पाकिस्तानको सुरुवात आज पनि राम्रो हुन सकेन । पहिलो विकेटको रुपमा ओपनर इमाम उल हकलाई ७ ओभर ६ बलमा ब्यक्तिगत १० रनमा गुमाएको पाकिस्तानले दोस्रो विकेटका रुपमा फखार जमानलाई व्यक्तिगत ३१ रनमा गुमाउनु परेको थियो । जमान कुलदिप यादवको बलमा एलबीडब्लुको सिकार भएका भए ।

जमान आउट भएको एक ओभर पछि बाबर आजम ९ रनमा रन आउटको सिकार भएपछि पाकिस्तान थप दबाबमा आएको थियो । चौथो विकेटका लागि मालिक र कप्तान सरफराज अहमदले १०७ रनको सतकीय साझेदारी गर्दै पाकिस्तानको ब्याटिङ इनिङ उकासेका थिए ।

मालिकले ९० बलमा ४ चौका र २ छक्का प्रहार गर्दै ७८ रन बनाए । उनी ४४ औँ ओभरमा बुमराहको बलमा विकेटकिपर महेन्द्र सिंह धोनीको हातबाट क्याच आउट हुँदै पेभिलिएन फकिए । त्यस्तै सरफराजले ६६ बलमा २ चौका प्रहार गर्दै ४४ रन बनाए । आक्रमक ब्याटिङ गरेका आसिफ अलीले २१ बलमा १ चौका र २ छक्का प्रहार गर्दै ३० रनमा आउट भए । आसिफ अली नेपालमा भएको एभरेस्ट प्रिमियर लिगमा पोखरा राइनोजबाट खेलेका थिए ।

पाकिस्तानका अन्य सादब खान १० आउट हुदा महोमम्द नवाजल १५ र हसन अली २ रनमा नट आउट रहे । भारतका लागि जस्प्रित बुमराह, युजवेन्द्र चाहल र कुलदिप यादवले समान २ विकेट लिए ।