यूएई (एजेन्सी) – अफगानिस्तानका युवा स्टार रशिद खान ब्याटिङ र बलिङ दुवै पक्षमा चम्किएपछि अफगानिस्तानले एसिया कप अन्तर्गत अन्तिम लिग खेलमा बंगलादेशलाई १ सय ३६ रनले पराजित गरेको छ । अफगानिस्तानले प्रस्तुत गरेको २ सय ५६ रनको लक्ष्य पछ्याउने क्रममा बंगलादेश १  सय १९ रनमा समेटियो ।

टस जितेर ब्याटिङ रोजेको अफगानिस्तानले निर्धारित ५० ओभरमा ७ विकेट गुमाउँदै २ सय ५५ रन जोडेको थियो । ४१ औं ओभरमा १६०-७ को स्थितिमा रहेको अफगानिस्तानलाई रशिद र गुल्बदीन नाइबको अविजित साझेदारीले उकासेको थियो । यी दुइले आठौं विकेटका लागि ५५ बलमा अविजित ९५ रन जोडेका थिए । नाइबले ३८ बलमा ५ चौकाको मदतले नटआउट ४२ रन बनाए । रशिदले अर्धशतक जोड्ने क्रममा ३२ बलको सामना गर्दै ८ चौका र १ छक्का प्रहार गर्दै ५७ रनमा नटआउट रहे ।

त्यसअघि मध्यक्रमका ब्याट्सम्यान हस्मतुल्लाह शाहिदीले ५८ रन जोड्दै इनिङस सम्हालेका थिए । उनले ९२ बल खेल्दै ३ चौका हने । ओपनर मोहमद सहजादले ४७ बलमा ४ चौकासहित ३७ रनको योगदान दिए । समिउल्लाह शेनावारीले १८ रन र मोहमद नाबीले १० रन जोड्दा कप्तान अश्गर अफगान र इहसानउल्लाहले ८-८ रन जोडे । बंगलादेशका लागि शाकिब अल हसनले ४, अबु हैदरले २ तथा रुबेल होसेनले १ विकेट हात पारेका थिए ।

जवाफी ब्याटिङमा उत्रिएको बंगलादेशले अफगानिस्तानको स्पिन आक्रमणको सामना गर्न सकेन । शकिब अल हसनले ३२, महुमुदुल्लाहले २७ तथा मोसादेक होसैनले नटआउट २६ रन जोड्नुबाहेक अन्य ब्याट्सम्यानले दोहोर अंक छुन सकेनन् । महत्त्वपूर्ण खेलाडीलाई विश्राम दिएको खेलमा बंगलादेशको ब्याटिङ निकै फितलो रहयो । अफगानिस्तानका लागि रशिद, मुजिब उर रहमान र नाइबले २-२ विकेट लिए । अफताब आलम, मिहमद नाबी र रहमत शाहले १-१ विकेट हात पारे ।

यस नतिजासँगै एसिया कपको शीर्ष ४ टोलीको टुङ्गो लागेको छ । समूह ‘ए’ बाट भारत र पाकिस्तान तथा अर्को समूहबाट अफगानिस्तान र बंगलादेश अगाडी बढेका छन् । सुपर चार चरणमा सबै टोलीले एक अर्काको सामना गर्नेछन् ।