काठमाडौं(हाम्रो खेलकुद)-  पोखरामा कात्तिक दोस्रो साताबाट आयोजना हुने पोखरा प्रिमियर लिग (पीपीएल) टी–ट्वान्टी क्रिकेट प्रतियोगिताको लागि खेलाडी दर्ता प्रक्रिया आजबाट शुरु भएको छ ।

फाइल तस्बिर

आयोजक क्विन्स इभेन्ट्स प्रालिले बुधबार एक विज्ञप्ति जारी गर्दै प्रतियोगिताको लागि खेलाडी दर्ता प्रक्रिया शुरु भएको उल्लेख गरेको छ । खेलाडी दर्ता प्रक्रियासँगै अक्सनको तयारीसमेत अन्तिम चरणमा पुगेको आयोजक क्विन्स इभेन्ट्स प्रालिका प्रवन्ध निर्देशक छुम्वी लामाले जानकारी गराएका छन् ।

पीपीएलमा सहभागी हुन इच्छुक खेलाडीहरुले इ–सेवामार्फत १ हजार रुपैया शुल्क तिरेर दर्ता गर्न सक्नेछन् । खेलाडी दर्ता प्रक्रिया २५ सेप्टेम्वरभित्र भरिसक्नुपर्नेछ । पीपीएलमा सहभागी हुने खेलाडीलाई क्याप्ड सिनियर, क्याप्ड एज लेभल र अनक्याप्ड गरी तीन श्रेणीमा विभाजन गरिएको छ ।

क्याप्ड सिनियरमा नेपालको सिनियर राष्ट्रिय टिमबाट प्रतिनिधित्व खेलाडीलाई राखिएको छ । क्याप्ड एज लेभलमा नेपालको उमेर समूह (यू–१५, यू–१७, यू–१९, यू–२१ र यू–२३) टिमको प्रतिनिधित्व गरेका खेलाडीलाई राखिएको छ ।

अनक्याप्ड श्रेणीमा नेपालको राष्ट्रिय र उमेर समुहको टिमबाट खेलेका बाहेकका खेलाडीलाई राखिएको छ । क्याप्ड सिनियर खेलाडीको न्युनतम मुल्य ५० हजार रुपैया राखिएको छ भने अधिकतम मुल्य २ लाख ५० हजार छ ।

क्याप्ड एज लेभलको न्युनतम मुल्य पनि ५० हजार राखिएको छ भने अधिकतम मुल्य १ लाख ५० हजार निर्धारण गरिएको छ ।

अनक्याप्ड श्रेणीको न्युनतम मुल्य ३० हजार र अधिकतम मुल्य १ लाख रुपैयाा राखेको छ । पिपिएलका लागि एक टिमले न्युनतम १५ खेलाडी र अधिकतम १८ खेलाडी आबद्ध गर्नुपर्नेछ ।

अक्सनबाट न्युनतम १० खेलाडी आवद्ध गर्नुपर्नेछ । एक टिमले १ मार्की खेलाडी, २ जना विदेशी खेलाडी र २ जना लोकल आइकन प्लेयरलाई पनि राख्नुपर्ने । ६ टिमले पोखरा रंगशाला स्थित क्रिकेट मैदानमा प्रतिस्पर्धा गर्नेछ ।