काठमाडौं (हाम्रो खेलकुद) – नेपाली यु–१९ टिमले भारतको लखनउमा जारी चार टोलीबीचको एक दिवसीय सिरिजमा लगातार दोस्रो पराजय बेहोरेको छ । नेपाल भारतको यु–१९ को ‘ए’ टिमसँग ८ विकेटले पराजित भएको हो । त्यसअघि नेपाल ‘बी’ टिमसँग ४० रनले पराजित भएको थियो ।

लखनउस्थित नवनिर्मित एकना अन्तर्राष्ट्रिय क्रिकेट मैदानमा शुक्रबार भएको खेलमा नेपालले दिएको १ सय ५७ रनको लक्ष्य भारतले २४ ओभर १ बलमा २ विकेट गुमाएर पूरा ग¥यो । भारतका वाई भी राठोरको अविजित ४९ रन बनाए । कप्तान अनुज रावतको ४७ रन जोड्दा प्रभसिमरन सिंह ४६ रनमा नटआउट रहे । नेपालका कमल सिंह ऐरी र पवन सर्राफले समान १ विकेट लिए ।

यसअघि टस जितेर पहिले ब्याटिङ गरेको नेपालले ४५.५ ओभरमा सबै विकेट गुमाउँदै मात्र १ सय ५६ रनको मध्यम योगफल तयार पारेको थियो । कमजोर शुरुवात गरेको नेपालले पहिलो ३ विकेट गुमाउदा २३ रनमात्रै बनाएको थियो । तृतराज दासले ४६ रन तथा सन्दिप जोराले ६६ रन बनाउदै इनिङ्स उकासेका थिए । उनीहरुको साझेदारी टुटेपछि नेपालले राम्रो प्रदर्शन गर्न सकेन । भारतका वाईडी मंगवानी र अजय गौडले समान ४ विकेट लिए ।

लगातार दोस्रो जित निकालेको भारत यु–१९ ‘ए’ ६ अंकसहित शीर्ष स्थानमा छ । नेपाल अंकविहीन छ । नेपालले अब अन्तिम खेलमा आइतबार अफगानिस्तानसँग खेल्नेछ ।