काठमाडौं (हाम्रो खेलकुद) – एसिया कप छनोट अन्तर्गत लिग चरणको अन्तिम खेलमा हङकङविरुद्ध टस जितेर ब्याटिङ रोजेको नेपालले निकै खराब प्रदर्शन गरेको छ । नेपालले ३८ औं ओभरमा सबै विकेट गुमाउनुअघि ९५  रन मात्र जोड्न सक्यो ।

नेपालले इनिङसको पहिलो बलमा नै ओपनर सुवास खकुरेललाई गुमाएको थियो । उनी तनवीर अफजलको बलमा बोल्ड भए । त्यसपछि क्रिजमा आएका कप्तान पारस खड्काले केहि आशा जगाएपनि उनी १४ रन जोड्दै विकेटकिपरको हातबाट समातिए ।

अर्का ओपनर अनिल शाह पनि १५ रन जोड्दै पेभेलियन फर्किए । मध्यक्रममा ज्ञानेन्द्र मल्ल १२ रनमा कट बिहाइन्ड भए । दीपेन्द्रसिंह ऐरीले २ तथा सागर पुनले ७ रनमात्र जोड्न सके । सोमपाल कामीले खाता खोल्न सकेनन् । नेपाली खेलाडीलाई तीव्र गतिका बलरहरुले खेलको सुरुआत देखिनै समस्या दिएका थिए ।

आरिफ शेखले तल्लोक्रमका खेलाडीसँग साझेदारी गर्दै १८ रन जोडे । वसन्त रेग्मीले पनि २ चौकाको मदतले नटआउट १५ रन बनाए । सन्दीप लामिछानेले २ र ललित नारायण राजवंशी शून्यमना आउट भए । हङकङका एहसान खानले ४ विकेट लिँदा तनवीर अफजल र मोहमद एजाज खानले २-२ विकेट लिए ।

फाइनलमा स्थान बनाउन नेपालले यस खेलमा फराकिलो अन्तरको जितसँगै अर्को खेलमा ओमनले यूएईलाई पराजित गर्नुपर्ने अवस्था छ । यूएई आफैं पनि अर्को चरणमा पुग्न जित चाहिएको अवस्थामा नेपाललाई फाइनल पुग्न निकै कठिन देखिन्छ । हङकङ पनि जित दर्ता गरे अर्को चरणमा पुग्नेछ । शीर्ष ४ टोलीको नै दोस्रो चरण पुग्ने सम्भावना जीवित रहेकाले लिग चरणको अन्तिम खेल निकै रोमाञ्चक हुने अपेक्षा गरिएको छ ।

नेपालले प्रतियोगिताको सुरुआती दुई खेल गुमाएपछि प्रतियोगिताको फाइनल पुग्ने आशा पातलिएको थियो । यूएई र ओमानलाई नतिजा सुम्पिएको नेपालले त्यसपछि भने मलेसिया र सिंगापुरलाई हराएको हो ।