काठमाडौं (हाम्रो खेलकुद) – एसीसी एसिया कप छनोट मलेसियामा जारी छ । अर्काे महिना युनाइटेड अरब इमिरेट्स (युएईं) मा आयोजना हुने एसिया कप खेल्ने लक्ष्यमा रहेको नेपाल शुरुवाती दुई खेलमा पराजित भएपछि एसिया कप खेल्ने झिनो सम्भावना मात्रै बाँकी छ ।

यस्तो अवस्थामा नेपालले एसिया कप खेल्ने सम्भावना जीवितै राख्न ‘गर या मर’ को अवस्थामा मलेसियासँग शनिबार प्रतिस्पर्धा गर्दैछ । खेल मलेसियाको किनरारा ओभल मैदानमा नेपाली समयअनुसार बिहान ७ः१५ बजेपछि शुरु हुनेछ । प्रतियोगिताको फाइनल खेल्ने आशा जिवितै राख्न नेपालले बाँकी सबै तीन खेल जित्नुपर्ने दवाव छ ।

शनिबार मलेसियाविरुद्ध मैदान उत्रदा नेपालको एकमात्र लक्ष्य निश्चित जित हुनेछ । यो खेलमा पनि पराजित भए नेपालको एसिया कप खेल्ने सपना समाप्त हुनेछ । अघिल्ला दुई खेलमा नेपालले ब्याटिङमा मध्यम प्रदर्शन गरेपनि बलिङ र फिल्डिङ सोचेजस्तो हुन सकेको छैन । ओपनिङमा समस्या नेपालको पुरानै रोग हो । तर, यसपटक ओपनिङमा केही सुधार भएपनि मध्यक्रममा कुनै पनि ब्याट्सम्यानले राम्रो खेल्न सकेको छैन ।

मलेसियाविरुद्ध जित हात पार्न यि सबै पक्ष सुधार गर्नुपर्ने हुन्छ । यता, पहिलो खेलमै हङकङलाई स्तब्ध पारेको मलेसिया दोस्रो खेलमा ओमानसँग २ विकेटले पराजित भएको थियो ।

नेपालले अबको तीन खेलमा जित हात पारे ६ अंक हुनेछ । र छनोटको सम्भावना जीवितै हुनेछ । अबको कुनै एक खेल गुमाए नेपाल स्वत प्रतियोगिताबाट बाहिरिने छ ।