साउथह्याम्प्टन (एजेन्सी)– भारतीय बलरहरुले कसिलो बलिङ गरेपछि इंग्ल्यान्डको ब्याटिङ फेरि एकपटक राम्रो चल्न सकेन । चौथो टेस्टको पहिलो दिन बिहीबार घरेलु टोली पहिलो इनिङ्समा २ सय ४६ रनमा अलआउट भएपछि भ्रमणकारी टोलीले ब्याटिङ सुरु गरेको छ । भारतले विना विकेटको क्षती १९ रन बनाएपछि पहिलो दिनको खेल समाप्त भएको थियो ।

शिखर धवन ३ र केएल राहुल ११ रनमा अविजित छन् । पाँच टेस्टको श्रृखंलामा इंग्ल्यान्ड २–१ ले अगाडि छ । भारतका लागि जसप्रित बुमराहले उच्च प्रदर्शन गरे भने अन्य बलरले पनि उनलाई राम्रो साथ दिएका छन् । इङ्ल्यान्डका लागि युवा अलराउन्ड साम कुरानले ७८ रन बनाएका थिए ।

भारतीय कप्तान विराट कोहलीले अघिल्लो टेस्टकै टोलीलाई निरन्तरता दिएका थिए । उनले चौथो श्रृखंलामा चौथो पटक टस हारेका थिए । घरेलु टोलीका कप्तान जोए रुटले टस जितेर ब्याटिङ रोजेका थिए । इग्ंल्यान्डले मजबुद सुरुवात गर्ने अनुमान गरिएको थियो, तर त्यस्तो हुने सकेन । ३५ ओभर भन्दा कममै घरेलु टोलीले ८६ रन जोड्दा ६ विकेट गुमाई सकेको थियो ।

घरेलु टोलीका लागि मोइन अलिले ४०, बेन स्कोक्सले २३, जोस बटलरले २१, मोइन अलि र स्टुवार्ट बोर्डले १७ रन जोडे । भारतका लागि बुमराहले ३, इशान्त शर्मा, मोहम्मद सामी र रविचन्द्रन आश्विनले समान २ तथा हार्दिक पाण्डेयाले १ विकेट लिएका थिए ।