काठमाडौं (हाम्रो खेलकुद)– नेपाली राष्ट्रिय क्रिकेट टोलीका कप्तान पारस खड्काले बुधबार मलेसियामा शुरु हुने एसीसी एसिया कप छनोट चरण पार गर्नु नै टोलीको मुख्य लक्ष्य रहेको बताएका छन् । क्वालालम्पुरमा भएको खेल अघिको पत्रकार सम्मेलनमा पारसले एसिया कप पुग्ने लक्ष्यसहित टोली मलेसिया पुगेको बताए ।

‘हामीले एसिया कपको लागि श्रीलंकामा एक हप्ताको प्रशिक्षण गर्ने मौका पाएका छौं । यो प्रशिक्षणले हामीलाई धेरै सहयोग पुगेको छ । हामी एसिया कप छनोटमा राम्रो शुरुवात गर्दै अघि बढ्ने योजनामा छौं ’ पत्रकार सम्मेलनमा पारसले भने, ‘तर, हामीले बुधबार खेल्न लागेको मैदान हाम्रो लागि नयाँ मैदान हो । हामी मैदान र विपक्षीको अवस्था हेरेर रणनीति बनाउनेछौं । यसको अर्थ हामी विजयी शुरुवातको लक्ष्यमा हुनेछौं । हामी हरेक क्षेत्रबाट राम्रो गर्ने प्रयासमा हुनेछौं ।’

उनले छनोटमा सहभागी सबै ६ टोली उत्तिकै बलियो रहेको बताए । ‘छनोटमा सहभागी सबै टोली समान स्तरका छन् । सबै खेल हाम्रो लागि उत्तिकै महत्वपूर्ण छ । कुनै पनि खेल हाम्रो लागि सहज हुनेछैन । सबै खेल जित्न हामीले उत्कृष्ट क्रिकेट खेल्नुपर्ने हुन्छ ’ पारसले थपे, ‘युवा र अुनभवी खेलाडी रहेका कारण टोली अहिले सन्तुलित छ । हाम्रो पहिलो प्रतिद्धन्द्धी ओमान पनि बलियो टोली हो । हामी ओमानलाई पराजित गर्न सक्षम छौं । आशा छ हामी एसिया कपको लागि छनोट हुन योग्य छौं ।’

नेपाल, ओमानसँगै छनोटमा युईए, हङकङ, सिंगापुर र मलेसिया छन् । छनोटका सहभागी सबै टोलीले एक अर्कासँग प्रतिस्पर्धा गरेपछि विजेता टोली यसै महिनाको अन्त्यमा सुरु हुने एसिया कपका लागि छनोट हुनेछ । विजेता टोली भारत र पाकिस्तान रहेको समूह ‘ए’ मा पर्नेछ ।