काठमाडौं (हाम्रो खेलकुद)-नेपाली राष्ट्रिय क्रिकेट टिमका महत्वपूर्ण दुई सदस्य शरद भेषावकर र बसन्त रेग्मी नेपाल बंगलादेश (एनबी) बैंकको ब्राण्ड एम्बासडर नियुक्त भएका छन् । बैंकले आइतवार कमलादीस्थित कार्यालयमा दुई खेलाडीसँग दुई वर्षको लागि सम्झौता गरेको हो ।

सम्झौतापत्रमा बैंकका सिइओ ज्ञानेन्द्र प्रसानद ढुंगाना र क्रिकेट खेलाडीद्वय शरद र बसन्तले हस्ताक्षर गरे । बैंकका सिइओ ढुंगानाले आगामी दुई वर्षका लागि दुई लेजेण्ड खेलाडीसँग सम्झौता गरेको र यो सुरुवात भएको बताए ।

‘अहिले क्रिकेटमा चार्म बढ्दैछ । हामीले नगरे कसले गर्छ । राज्यसँग पनि ठूलो स्रोत छैन । त्यसैले कर्पोरेट क्षेत्रलेले पनि खेलाडीलाई सहयोग गर्नुपर्छ भनेर यो काम गरेका हौं ।’ सिइओ ढुंगानाले भने, ‘भोलिको दिनमा पनि नेपाली खेलाडीलाई सहयोग गर्नका लागि हामीले लेजेण्ड खेलाडी छानेका हौं । हामी उनीहरुलाई लिए देशका विभिन्न स्कुल कलेजमा जानेछौ । नयाँ खेलाडीलाई पनि क्रिकेटमा लाग्न प्रेरणा मिलोस् भन्ने हाम्रो चाहना हो ।’

एम्बासडर नियुक्त भएपछि शरद र बसन्तले एनबी बैंकलाई धन्यवाद दिँदै यसले आफूहरुलाई सहयोग पुग्ने बताए । एभरेष्ट प्रिमियर लिगको आयोजक इपीएलको सहकार्यमा उक्त सम्झौता भएको हो । राष्ट्रिय क्रिकेट टिमका कप्तान पारस खड्का सेन्चुरी बैंक तथा उपकप्तान सिटिजन्स बैंकको ब्राण्ड एम्बासडर नियुक्त भइसकेका छन् । यस्तै सन्दीप लामिछाने सानिमा बैंक तथा दीपेन्द्रसिंह ऐरी ग्लोबल आइएमई बैंकसँग अनुबन्ध भइसकेका छन् ।