काठमाडौं (हाम्रो खेलकुद)-लामो समयदेखि विवादमा रहेको मुलपानी क्रिकेट मैदानको मुआब्जा विवाद समाधान भएको छ । मन्त्री परिषदको मंगलबार बसेको बैठकले मुलपानी क्रिकेट मैदानको मुआब्जा विवाद समाधानको लागि जग्गा धनीलाई जग्गाको साटो जग्गा उपलब्ध गराउने निर्णय गरेसँगै विवाद समाधान हुने भएको हो ।

मुआब्जा विवाद समाधान भएसंँगै मुलपानी क्रिकेट मैदानको निर्माण कार्य अघि बढ्नेछ । सरकारले मैदानभित्र पर्ने जग्गा मैदान नजिकै रहेको अर्को स्थानमा दिने निर्णय गरेको हो । अब जग्गा धनीले मैदानमा रहेको आफ्नो जग्गाको नाप अनुसारको जग्गा पाउनेछन् । यसअघि मैदानभित्र रहेको करिब ५२ आना जग्गाको मुआब्जा विवाद नमिल्दा मैदान निर्माण कार्य प्रभावित बनेको थियो ।

विवाद समाधानको लागि मुलपानी क्रिकेट मैदान निर्माण समन्वय र सहजीकरण समितिले जग्गाको बदला जग्गा दिनुपर्ने निर्णय गरेको थियो । जग्गा धनीले उक्त निर्णय स्वीकार गरेपनि मन्त्रिपरिषदबाट उक्त निर्णय पास हुन सकेको थिएन । सरकारको मन्त्रिपरिषद् स्तरीय बैठकले मुआब्जा विवाद समाधान गरेको र मन्त्रिपरिषद्को बैठकको निर्णयसंगै मुलपानी अन्तर्राष्ट्रिय क्रिकेट मैदान दुई बर्षभित्र बन्ने राष्ट्रिय खेलकुद परिषदका सदस्यसचिब केशव कुमार बिष्टका प्रेस सल्लाहकार रोहित दाहालले जानकारी गराए ।

‘लामो समयदेखिको मुआब्जा विवाद समाधान भएको छ । मन्त्रीपरिषदको बैठकले सट्टापट्टा गरेर जग्गा धनीलाई अर्को स्थानमा जग्गा दिने निर्णय गरेको छ ’ प्रेस सल्लाहकार दाहालले भने, ‘जग्गा धनीले खोजेको जति जग्गा अन्य ठाउमा उपलब्ध गराउने मन्त्रिपरिषद्को बैठकले निर्णय गरेको छ । अब मैदान दुई बर्षभित्र तयार हुने गरी अघि बढ्नेछ ।’