काठमाडौं (हाम्रो खेलकुद) – राष्ट्रिय क्रिकेट टोलीका कप्तान पारस खड्काले अबको योजना एसिया कपको लागि छनोट हुनु रहेको बताएका छन् । नेदरल्यान्ड्सविरुद्धको ऐतिहासिक एकदिवसीय क्रिकेट श्रृखंला खेलेर सोमबार स्वदेश फर्केपछि त्रिभुवन विमानस्थलमा पत्रकारहरुसँग पारसले भने ,‘एसिया कप नजिकिएको अवस्थामा अबको यात्रा एसिया कपलाई छनोट हुने हो । हामीसामु एसिया कपको अर्को ठूलो अवसर छ । छनोटमा राम्रो खेल्दै एसिया कपमा छनोट हुने योजना छ ।’

तस्बिर – विवेक सुवेदी /हाम्रो खेलकुद

नेपाली टोलीका प्रशिक्षक जगत टमाटाले नेदरल्यान्ड भ्रमण सफल रहेको बताए । ‘नेपाली टिमले फिल्डिङ र बलिङमा उत्कृष्ट प्रदर्शन गरे । ब्याटिङमा पनि सुधार गरेको छ । अझै यस्तै प्रतियोगिता खेल्न पाए नेपाली खेलाडी माथिल्लो स्तरमा पुग्न सक्नेछ ’ प्रशिक्षक टमाटाले भने, ‘भारत र पाकिस्तानसँग एसिया कप खेल्ने लक्ष्य छ । यसका लागि खेलाडीमा अझै एक्सपोजरको अभाव छ । नेपाली खेलाडी पोटेन्सियल रहेकाले एक्सपोजर पाए भारत र पाकिस्तानसँग खेल्न सक्ने क्षमता छ ।’

प्रशिक्षक टमाटाले एसिया कप छनोटको लागि दुईरचार दिनको आराम गरेर क्याम्प थालिने बताए । उनले छनोटको लागि श्रीलंकामा प्रशिक्षणका लागि प्रपोजल पठाएको र एकरदुई दिनमा थाहा हुने जानकारी दिए । एसिसी एसिया कप छनोट प्रतियोगिता आगामी भदौ ११ देखि २२ सम्म मलेसियामा हुँदैछ । छनोट प्रतियोगितामा ६ टिमबीच प्रतिस्पर्धा हुनेछ । युएई, हङकङ, नेपाल, सिंगापुर, मलेसिया र ओमानबीच प्रतिस्पर्धा हुनेछ । प्रतियोगिताको विजेता टिम एसिया कपका लागि छनोट हुनेछ ।

६ टिममध्ये छनोट पार गर्ने एक टिम भदौ ३० देखि युएईमा हुने एसिया कपमा छनोट हुनेछ । नेपाल र युइई एकदिवसीय मान्यता प्राप्त राष्ट्र हुन् । नेपाली टोली नेदरल्यान्ड्सविरुद्ध डेब्यू सहित दुईवटा एक दिवसीय अन्तर्राष्ट्रिय क्रिकेट खेलेर स्वदेश फर्केको हो । त्यसअघि टोलीले लर्डसमा मेरिलबोन क्रिकेट क्लब (एमसीसी) र नेदरल्यान्डसँगको त्रिकोणात्मक ट्वान्टी ट्वान्टी श्रृखंलामा खेलेको थियो ।

जसमा नेपाल र नेदरल्यान्ड्स संयुक्त रुपमा विजेता बनेका थिए । ट्वान्टी ट्वान्टी श्रृखंला अघि नेपालले ४ वटा अभ्यास खेल समेत खेलेको थियो । टोली साउन २ गते युरोप भ्रमणमा निस्केको थियो । नेपालले नेदरल्यान्डविरुद्धको एक दिवसीय श्रृखंलामा १–१ बराबरी गरेको थियो । पहिलो खेलमा मध्यक्रमका ब्याट्सम्यान चल्न नसक्दा नेपाली टोली ५५ रनल पराजित भएको थियो ।

युरोप भ्रमणका बारेमा पारसले भने, ‘युरोप भ्रमण समग्रमा सफल भएको मान्नुपर्छ । हामीले त्यहाँ राम्रो खेल्ने प्रयास ग¥यौं । पहिलो खेलमा राम्रो शुरुवात गर्नका बावजुत मिडल अर्डर चल्न नसक्दा खेल गुमाएपनि नेपालले तुलनात्मक रुपमा राम्रो खेल पस्किन सफल भएको छ ।’ नेपाली टोलीलाई विमानस्थलमा राखेप सदस्यसचिव केशवकुमार विष्टलगायत क्रिकेट समर्थकले स्वागत गरे ।