काठमाडौं (हाम्रो खेलकुद)– एक दिवसिय मान्यता प्राप्त गरेपछिको पहिलो भ्रमण समग्रतामा सफल रहेको नेपाली क्रिकेट टोलीका कप्तान पारस खड्काले बताएका छन् । नेदरल्यान्ड्सविरुद्ध ‘डेब्यू’ एक दिवसियसहित दुई खेल खेल्नुअघि नेपालले इंल्यान्डमा त्रिकोणात्मक ट्वान्टी ट्वान्टी श्रृखंला र चार वटा अभ्यास खेल खेलेको थियो ।

‘वर्षाका कारण लर्डसको ट्वान्टी ट्वान्टी श्रृखंला सोचे अनुरुपको हुन सकेन ,’ पारसले हाम्रो खेलकुदलाई भने, ‘बाँकी समग्रमा यो भ्रमण राम्रो रह्यो । ‘नेपाल, नेदरल्यान्ड्स र एमसीसीबीचको ट्वान्टी ट्वान्टी बर्षाका कारण प्रभावित भएको थियो । नेपाल र नेदरल्यान्ड्सले ६ ओभरमा घटाइएको खेलमा एमसीसीलाई हराएका थिए ।

नेपाल र नेदरल्यान्ड्सबीचको खेल वर्षाका कारण रद्द भएपनि दुवै टोली संयुक्त विजेता बनेका थिए । त्यसअघि नेपालले खेलका ४ मध्ये ३ अभ्यास खेल जितेको थियो भने एउटा गुमाएको थियो । तर, टोलीको मुख्य उद्देश्य डेब्यू एक दिवसय क्रिकेटलाई यादगार बनाउने थियो ।

तर, नेदरल्यान्ड्सविरुद्ध बुधबार भएको पहिलो खेल नेपालले ५५ रनले गुमाएको थियो । बलिङमा उच्च प्रदर्शन गर्दै नेदरल्यान्ड्लाई १ सय ८९ रनमा रोक्न सफल भएपनि टोलीको ब्याटिङ चल्ने सकेन १ सय ३४ रनमै अलआउट भएको थियो । । यद्दपी उपप्तान ज्ञानेन्द्र मल्ल नेपालका लागि एक दिवसिय क्रिकेटमा अर्धशतक बन्ने पहिलो खेलाडी बने ।

तर, दोस्रो खेलमा नेपालले १ रनको सनसनीपूर्ण जित निकाल्दै श्रृखंलामा बराबरी गरेको थियो । पहिला ब्याटिङ गरेको नेपालले २ सय १६ रन बनाएको थियो । पहिलो खेलमा ४ विकेट लिएका कप्तान पारसले दोस्रो खेलमा अर्धशतक पुरा गरे । सोमपाल कामीले अर्धशतक मात्र पुरा गरेनन् ३ विकेट पनि लिए । पारस आफैले त्यो खेलमा २ विकेटका साथै नेदरल्यान्ड्सको अन्तिम विकेटलाई रन आउट गर्दै नेपाललाई जित दिलाए ।

‘अन्तिम सम्म पनि नहार्ने र लड्ने बानीले नै नेपाललाई सफलता दिलाएको पारसले बताए । अन्तिम सम्म आशा छोड्न हुन्न भन्नेमा हामी सचेत छौं । खेल हो जे पनि हुन सक्छ ,’ उनले भने, ‘खेलमा उच्च प्रदर्शन जति जरुरी छ धर्यता पनि त्यतिनै जरुरी हुन्छ । हामीले त्यहि गर्यौं ।’ पहिलो खेलमा पनि जित्न सम्भावना हुँदा हुँदै सोचे अनुरुपको प्रदर्शन गर्न नसकेको उनको भनाई थियो ।

उनले भने, ‘हामीले सुरुवात राम्रो गर्न सकेनौं र सम्हालिएको समयमा पनि एकरुपताको प्रदर्शन हुने सकेन ।’ तर, दोस्रो खेलमा टोलीले सामूहिक प्रदर्शन गर्दै जित सम्भव भएको बताए । अन्तिम बलमा नेदरल्यान्ड्सका लागि जितका लागि दुई रनको आवश्यकता थियो । त्यस्तोमा पारसले रनआउट गर्दै नेपाललाई जित दिलाएका थिए ।भ्रमण सकेर नेपाली टोली सोमबार स्वदेश आइपुग्दैछ ।