काठमाडौं (हाम्रो खेलकुद)- युवा उमेरमा इरमान खानको छवि ‘प्ले–ब्वाइ’ को थियो । उनलाई यसमा सायद मज्जा पनि थियो । लहोरको धानद्य परिवारमा जन्मेका इमरानले अक्सफोर्ड विश्वविद्यालयमा पढे र क्रिकेट खेले पनि । पछि उनी पाकिस्तानी क्रिकेट टिमका सदस्य मात्र भएनन्  , कप्तान पनि भए । उनकै नेतृत्वमा त हो, पाकिस्तानले सन् १९९२ को वान डे विश्वकप जितेको ।

त्यसयता उनी राजनीतिमा लागे । खेलाडी छँदा उनले जुन खाले व्यक्तित्व बनाएको थियो, राजनीतिमा लागेयता त्यसको ठीक विपरित छवि बनाए । अहिले यिनै इमरान पाकिस्तानको प्रधानमन्त्री बन्ने तय जस्तै छ । उनको पीटीआई पार्टी त्यहाँको सबैभन्दा ठूलो पार्टी भएको छ, यसै साता सम्पन्न निर्वाचनमा । उनले लगभग २२ वर्ष राजनीतिमा बिताए र प्रधानमन्त्रीको पदसम्म पुग्न लगातार मिहिनेत गरे ।

यससँगै चर्चित खेलाडी भएर देशको सर्वोच्च पदसम्म पुग्ने उनी अर्को नाम भएका छन् । विश्व खेलकुदमा उत्तिकै ठूलो नाम भएर आ–आफ्नो देशको नेतृत्व गर्ने अवसर पाएका अरू खेल व्यक्तित्वहरू को को छन् त ? यसमा पहिलो नाम आउँछ, फुटबलका जर्ज वेह । उनले खेलाडी छँदा व्यवसायिक फुटबल पीएसजी, एसी मिलान, चेल्सी र म्यानचेस्टर सिटीबाट खेले । गत वर्ष मात्र उनी लाइबेरियाको राष्ट्रपति चुनिए ।

बक्सिङका मेनी प्याक्याउ पनि उत्तिकै चर्चित खेलाडी हुन् । उनी जत्तिको लोकप्रिय व्यक्तित्व फिलिपिन्समा अरू छैन भनिन्छ । त्यति मात्र होइन, उनी एक दिन फिलिपिन्सका राष्ट्रपति पनि हुनेछन् भनिन्छ । अहिले तत्काल भने उनी त्यहाँको सिनेटका सदस्य छन् । बक्सिङकै भिटाली क्लिट्स्को पनि उत्तिकै चर्चित खेलाडी हुन् । हेभिवेट बक्सिङमा उनी लामै समय च्याम्पियन रहे । अहिले उनी किभ सहरका मेयर छन् ।

रोमारियो त विश्व फुटबलले हेर्न पाएका सबैभन्दा राम्रा खेलाडीको सूचीमा समेत पर्छन् । यी ब्राजिली पूर्व खेलाडी पनि राजनीतिमा छन् । उनको उद्देश्य भने रियो डे जेनेरियोको गभर्नर पदमा निर्विचित हुने हो । यस्तै जापानी जुडोकी सबैभन्दा ठूला स्टार रोयोको तानी त्यहाँको माथिल्लो सदनका सदस्य छन् ।-

-एजेन्सीको सहयोगमा