काठमाडौं (हाम्रो खेलकुद)– युरोप भ्रमणमा रहेको नेपाली राष्ट्रिय क्रिकेट टोलीले आज तेस्रो अभ्यास खेल इस्ट लन्डन ११ सँग खेल्दैछ । टस हारेको नेपालले पहिले ब्याटिङको निम्तो पाएको छ ।

इस्ट लन्डनले टस जितेर पारस खड्काको कप्तानीमा रहेको नेपाली टोलीलाई ब्याटिङको निम्तो दिएको हो । यसअघिका दुई अभ्यास खेलमा नेपालले समान १ खेलमा जित र हार बेहोरेको थियो ।

यसअघि नेपालले ५० ओभरको पहिलो अभ्यास खेलमा ह्यामसायर होग्सलाई २ सय ४३ रनले हराएको थियो । नेपालको जितमा पारसले १ सय ६१ रनको शतकीय पारी खेलेका थिए ।

तर, दोस्रो अभ्यास खेलमा नेपाल पराजित भएको थियो । टी–२० मा भएको दोस्रो अभ्यास खेलमा नेपाल सेन्ट क्रससँग १९ रनले पराजित भएको थियो । पारसलाई दोस्रो खेलमा आराम दिइएको थियो ।

अभ्यास खेलपछि नेपालले क्रिकेटको मक्का मानिने इंग्ल्यान्डको लड्र्समा जुलाई अन्तिम साता हुने त्रिकोणात्मक टी–ट्वान्टी सिरिज खेल्नेछ । नेपाल, नेदरल्याण्ड र मेरिलिबोन क्रिकेट क्लब ९एमसिसी० बीच लड्र्समा हुने त्रिकोणात्मक सिरिज जुलाई २९ मा हुनेछ ।

त्रिकोणात्मक सिरिजपछि नेपाली टोली एकदिवसीय क्रिकेटको डेब्यु खेल खेल्न नेदरल्याण्ड जानेछन् । नेपाल र नेदरल्याण्डबीचको एकदिवसीय सिरिज अगस्ट १ र ३ मा हुनेछ।

नेपाली टोली -पारस खड्का (कप्तान) ज्ञानेन्द्र मल्ल (उपकप्तान) शक्ति गौचन सुवास खकुरेल (विकेटकिपर) शरद भेषवाकर अनिल कुमार साह रोहित कुमार पौडेल ललित राजवंशी दीपेन्द्र सिंह ऐरी सोमपाल कामी करण केसी