बुलावाओ (एजेन्सी) – पाकिस्तानका ओपनिङ ब्याट्सम्यान फखर जमानले जिम्बाब्वेविरुद्ध दोहोरो शतक बनाउंदै इतिहास रचेका छन् । एकदिवसीय श्रृंखलमा जमानले २ सय १० रन जोड्दै २१ वर्ष पुरानो रेकर्ड तोडेका हुन् ।

बायाँ हाते ब्याट्सम्यान जमानले पाँच खेलको एकदिवसीय श्रृंखलको चौथो खेलमा अवजित २ सय १० रन बनाए । यसअघि सइद अनवरले सन् १९९७ मा चेन्नईमा भारतविरुद्धको खेलमा १ सय ९४ रन बनाएका थिए जुन कुनै पनि पाकिस्तानी ब्याट्सम्यानका लागि एकदिवसीयमा सर्वाधिक स्कोर थियो ।

उनले खेलमा १ सय ५५ बलको सामना गर्दै २४ चौका र ५ छक्काको मद्दतले दोहोरो शतक प्रहार गरेका थिए । पाकिस्तानले जमानको २ सय १० रनको सहायताले ३ सय ९९ रनको योगफल बनाउन सफल भएको थियो । पाकिस्तानका अर्का ओपनर इमाम उल हकले १ सय १३ रन जोडे ।

जमान र इमामले पहिलो विकेटका लागि ३ सय ४ रनको उत्कृष्ट साझेदारी खेलेका थिए । यो एकदिवसीय क्रिकेटमा पहिलो विकेटका लागि सबैभन्दा ठुलो साझेदारी पनि हो ।

त्यस्तै ४ सय रनको लक्ष्यसहित जवाफी ब्याटिङमा उत्रिएको जिम्बाब्वे भने ४२ ओभर ४ बलमा सबै विकेट गुमाउँदै १ सय ५५ रन मात्र बनाउन सक्यो ।

अन्तिम खेल बांकी रहंदा पाकिस्तानको ४-० को अग्रता पनि रहेको छ । फखर जमान पाकिस्तानको तर्फबाट दोहोरो शतक बनाउने पहिलो ब्याट्सम्यान पनि बनेका छन् । विश्व क्रिकेटमा दोहोरो शतक बनाउने खेलाडीको सूचीमा उनी छैटौैँ नम्बरमा पर्दछन् ।

यसअघि भारतका रोहित शर्मा (३ पटक), सचिन तेन्दुल्कर र विरेन्द्र सहवाग, न्यूजिल्याण्डका मार्टिन गुप्टिल तथा वेष्ट इन्डिजका क्रिस गेलले एकदिवसीय खेलमा दोहोरो शतक प्रहार गरिसकेका छन् ।