काठमाडौं (हाम्रो खेलकुद) – पहिलो संस्करणको रौतहट प्रिमियर लिग (आरपिएल) ट्विान्टी ट्वान्टी क्रिकेट प्रतियोगिता असोजमा हुने भएको छ । आयोजक ओमेघा माध्यमिक स्कुल ललितपुरले शुक्रबार राजधानीमा पत्रकार सम्मेलनको आयोजना गर्दै पहिलो संस्करणको रौतहट प्रिमियर लिग आगमी असोज १ गतेदेखि १० गतेसम्म हुने जानकारी गराएको हो ।

प्रतियोगितामा विभिन्न १२ टिमको सहभागिता रहने प्रतियोगिता निर्देशक विनोद महर्जनले जानकारी गराए । उनका अनुसार सहभागी १२ टिमलाई चार समुहमा विभाजन गरिनेछ । हरेक समूका शीर्ष दुई टोलीले क्वार्टरफाइनलमा स्थान बनाउनेछ ।

प्रतियोगिताको विजेताले ३ लाख ५० हजारसहित ट्रफी मेडल र प्रमाणपत्र प्राप्त गर्नेछ । दोस्रो हुनेले १ लाख ५० हजार प्राप्त गर्ने आयोजकले जनाएको छ । प्रतियोगिताको सर्वोत्कृष्ट खेलाडीले जनही २५ हजार रुपैया र प्रतियोगिताको उत्कृष्ट ब्याट्सम्यान, बलर र उदियमान खेलाडीले समान १० हजार रुपैया प्राप्त गर्नेछ ।

प्रतियोगितामा सर्वाधिक छक्का हिर्काउनेले ८ हजार, सर्वाधिक चौका प्रहार गर्नेले ७ हजार र हरेक खेलका म्यान अफ दि म्याचले जनही २ हजार प्राप्त गर्ने आयोजकले जनाएको छ । प्रतियोगितामा सहभागी टिमबाट प्रवेश शुल्क स्वरुव ३५ हजार लिइएको बताइएको छ । समूह विभाजन भने गरिएको छैन । प्रतियोगिताका सबै खेलहरु रौतहट गुरुडास्थित श्री सुगर मिल्सको खेल मैदानमा हुनेछ ।