सप्तरी (हाम्रो खेलकुद)– बजाज खडक वारियर्सले प्रथम मेयर कप सप्तरी प्रिमियर लिग प्रतियोगिताको उपाधि जितेको छ । सप्तरी पब्लिक विन्देश्वरी स्कुल क्रिकेट मैदानमा बुधबार भएको फाइनल खेलमा बोदे बर्साइन थन्डर्सलाई ४ विकेटले पराजित गर्दै वारियर्स च्याम्पियन बनेको हो ।

टस हारेर ब्याटिङ गरेको बोदे बर्साइन थन्डर्सले निर्धारित २० ओभरमा ८ विकेट गुमाएर १ सय २७ रन बनायो । टिमका लागि कप्तान सिद्धान्त लोहनीले सर्वाधिक ३५ रनको योगदान दिएका थिए । यस्तै रोहित सिंहले २७, श्रवण यादबले १९, सन्दिप ढुंगानाले १६ रन बनाए ।

खडक वारियर्सका बलर उपेन्द्र रोय, बिबेक यादब र हरिशंकर शाहले समान २ विकेट लिए । १ सय २८ रनको लक्ष्य खडक वारियर्सले १९.१ ओभरमा ६ विकेट गुमाएर भेटायो । वारियर्सको जितमा पुस्प थापाले सर्वाधिक ४२ रनको योगदान दिए । म्यान अफ द म्याच समेत चुनिएका उनले ३२ बलमा ६ चौका र १ छक्का प्रहार गरे ।

४८ रनको योगफलमा ४ विकेट गुमाएको अवस्थामा ब्याटिङ गर्न आएका थापाले पाँचौ विकेटको लागि आशिष झासँग २२ रन तथा छैठौं विकेटको लागि फिर्दोश अन्सारीसँग ५० रनको साझेदारी गर्दै जितको आधार तयार गरेका थिए । फिर्दोश अन्सारीले अविजित २५ रन बनाए । प्रशान्त राई र बिबेक यादवले समान १६ रन बनाए । बोदे बर्साइनका नन्दन झा र श्रवण यादबले समान २ विकेट लिए ।

उपाधि सहित बजाज खडक वारियर्सले ट्रफीसहित १ लाख ५१ हजार रुपैयाँ हात पा¥यो । उपविजेता बोदे बर्साइन थन्डर्सले ट्रफी र ८१ हजार रुपैयाँमा चित्त बुझायो । वारियर्सका कप्तान विवेक यादव प्रतियोगिताको उत्कृष्ट खेलाडी घोषित भए । बोदे बर्साइनका नन्दन यादव उत्कृष्ट बलर र तिलाठी कोइलाडीका मेहबुव आलाम उत्कृष्ट ब्याट्समयान घोषित भए ।

तिलाठीकै राहुल मण्डल उदि यमान खेलाडी घोषित भए । उत्कृष्ट खेलाडी यादवले १५ हजार तथा उत्कृस्ट ब्याट्सम्यान र बलरले जनही १० हजार रुपैया प्राप्त गरे । विजयी टिम तथा खेलाडीहरुलाई राजविराज नगरपालिकाका मेयर सम्भु प्रसाद यादबले पुरस्कृत गरे । प्रतियोगिता गत २८ असारबाट शुरु भएको थियो । लिगको आधारमा भएको प्रतियोगितामा तीन टिमको सहभागिता रहेको थियो ।