काठमाडौं (हाम्रो खेलकुद)– एमसीसी र नेदरल्यान्डविरुद्धको खेलको लागि पारस खड्काको कप्तानीमा नेपाली क्रिकेट टोलीको मंगलबार घोषणा गरिएको छ । १५ सदस्यीय नेपाली टोलीमा विकेटकिपर ब्याट्सम्यान सुवास खकुरेलले पुनरागमन गरेका छन् । सुवासले करिव तीनवर्षपछि राष्ट्रिय टिममा पूनरागमन गरेका हुन् ।

सुवासले सन् २०१५ मा आइसीसी विश्व क्रिकेट लिग च्याम्पियनसिप अन्र्तगत युएईंमा पपुवा न्यु गिनीविरुद्ध नोभेम्वरमा अन्तिम खेल खेलेका थिए । त्यसयता चोटका कारण टिममा नरहेका सुवासले धनगढी प्रिमियर लिग र प्रधानमन्त्री कप एकदिवसीय राष्ट्रिय क्रिकेटमा उच्च प्रदर्शन गरेका थिए ।

टोलीको उपकप्तान ज्ञानेन्द्र मल्ल, अनिल कुमार साह, बसन्त रेग्मी, दीपेन्द्रसिंह ऐरी, करण केसी, ललित भण्डारी, ललित नारायण राजवंशी र मोहम्मद आरिफ शेखले अन्तिम १५ मा स्थान सुरक्षित गरे । यस्तै रोहति कुमार पौडेल, सन्दीप लामिछाने, शक्तिप्रसाद गौचन, शरद भेषवाकर र सोमपाल कामीले अन्तिम १५ मा स्थान सुरक्षित गरे ।

विनोद भण्डारी, सुनिल धमला, सुसन भारी र प्रदीप ऐरीलाई वैकल्पिक खेलाडीको रुपमा राखिएको छ । आइसीसीका प्रतिनिधि अमिनुल इस्लाम, मुख्य प्रशिक्षक जगत टमाटा र कप्तान पारस खड्का सम्मिलित तीन सदस्यीयले टोलीका लागि खेलाडी छनोट गरेका थिए ।

नेपाली टिम बिहिबार इंग्ल्यान्ड प्रस्थान गर्ने कार्यतालिका रहेको छ । त्रिकोणात्मक सिरिज लर्डस क्रिकेट मैदानमा जुलाई २९ तारिखबाट शुरु हुनेछ । नेपाल र नेदरल्यान्डले पाँच महिनाअघि मात्रै एकदिवसीय अन्तर्राष्ट्रिय मान्यता पाएको थियो ।