काठमाडौं (हाम्रो खेलकुद) – नेपाली युवा लेग स्पिनर सन्दीप लामिछाने क्यानेडियन लिग ग्लोबल टी–२० क्रिकेट लिग खेलेर भोलि नेपाल आइपुग्ने भएका छन् ।

ग्लोबल टी–२० मा पहिलो खेल गुमाएपनि उत्कृष्ट प्रदर्शन गरेका सन्दीप भोलि बिहान ८ः५० बजे जेट एयरवेजको विमानबाट त्रिभुवन अन्तर्राष्ट्रिय विमानस्थलमा आइपुग्ने नेपाली राष्ट्रिय क्रिकेट टिमका व्यवस्थापक रमन शिवाकोटीले जानकारी गराए ।

क्यानेडियन क्लब मोन्ट्रेल टाइगर्सबाट सन्दीपले पाँच खेलमा ८ विकेट लिएका थिए । जसमध्ये सन्दीपको टोलीले ६ खेलमा मात्र २ जित निकाल्न सफल भएको थियो । उनको टोली प्ले अफमा पुग्न सकेन ।

सन्दीपले पहिलो खेलमा ४ ओभरमा ५७ रन खर्चदै १ विकेट लिएका थिए । डेब्यु खेलमा उनले १ रन जोड्दा दोस्रो खेलबाट आफुलाई प्रमाणित गरेका थिए । दोस्रो खेलमा ४ ओभर बलिङ गरेका सन्दीपले १ मेडनसहित १९ रन खर्चदै १ विकेट लिए ।

तेस्रो खेलमा एक मेडनसहित १६ रन खर्चदै १ विकेट लिएका थिए । चौथो खेलमा चार ओभर बलिङ गर्दै ३४ रन खर्चिएर २ विकेट लिएका सन्दीपले अन्तिम खेलमा वेष्ट इण्डिज ‘बी’ विरुद्ध चार ओभर बलिङ गर्दै ३१ रन खर्चेर ३ विकेट लिन सफल भएका थिए ।

सन्दीपले अब आगामी अगस्टमा क्यारेवियन प्रिमियर लिग (सीपीएल) खेल्नेछन् । नेपाली राष्ट्रिय टिम नेदरल्यान्डविरुद्धको पहिलो एकदिवसीय क्रिकेट प्रतियोगिताको तयारीमा रहेको छ ।