काठमाडौं (हाम्रो खेलकुद)– आयरल्यान्डका अलराउन्डर केभिन ओ ब्रेयनले यो सिजनको एभरेष्ट प्रिमियर लिग (इपिएल) ट्वान्टी ट्वान्टी क्रिकेट प्रतियोगिता खेल्ने भएका छन् । टेष्ट मान्यता प्राप्त आयरल्यान्डका अलराउन्डर केभिनलाई इपिएल टोली काठमाडौं किङ्स ११ ले अनुबन्ध गरेको हो ।

इपिएल टोली काठमाडौं किङ्सले मंगलबार एक प्रेस विज्ञप्ति जारी गर्दै ३४ बर्षीय केभिनलाई पहिलो विदेशी खेलाडीको रुपमा क्लबमा अनुबन्धित गरेको जनाएको छ । उनी यो सिजन इपिएलका लागि अनुबन्धित हुने पहिलो खेलाडी पनि बने ।

‘केभिन विश्वस्तरीय अलराउन्डर हुन् । उनी देश र क्लबका लागि मुख्य खेलाडी हुन् । उनी नेपाल आएर खेल्न आतुर भएकाले उनलाई हामीले अनुबन्ध गरेको हो ’ किङ्सका प्रमुख कार्यकारी अधिकृत (सिइओ) राजजंग थापाले जारी गरेको प्रेस विज्ञप्तिमा लेखिएको छ ।

केभिन आईरिस टोलीबाट सबैभन्दा बढी खेल खेल्ने खेलाडी हुन् । २००६ देखी राष्ट्रिय टिममा रहेका केभिनले तीन सय बढी क्याप जितेका छन् । उनले आयरल्याण्डका लागि तीन एक दिवसीय र पाँच टी–ट्वान्टी क्रिकेट खेलेका छन् ।

यस्तै केभिन आयरल्यान्ड टोलीका लागि टेस्ट क्रिकेटमा शतक प्रहार गर्ने खेलाडी हुन् । उनले २०११ को विश्वकपमा इङ्ल्यान्डविरुद्ध शतक प्रहार गर्दै विश्वकपकै सबैभन्दा चाँडो शतक प्रहार गर्ने कीर्तिमान बनाएका थिए ।